“Спартак” легионерини сотмоқда. Бундан Ўруновга фойда борми?
- 3-феврал 2021, 13:00
- Zohir Toshxo’jayev
- 0
- Футбол
“Спартак” жамоаси ҳужумчиси Педро Роша яна Бразилияга қайтиб кетиши кутилмоқда. Бу футболчи ижара муддати якунланганидан сўнг, январда “Фламенго”дан қайтиб келган ва москваликларнинг Бирлашган Араб Амирликларида ташкил этилган ўқув-машғулот йиғинига жалб қилинган эди.
Россия оммавий ахборот воситалари тарқатаётган хабарларга қараганда, 26 ёшли футболчига Бразилия чемпионатининг бир неча жамоасидан жиддий таклиф бўлмоқда. Бразилияликлар қишки трансферлар вақтида Рошанинг шартномасини тўлиқ сотиб олмоқчилиги айтилмоқда.
“Спартак” Педро Рошани 2017 йилда “Гремио” клубидан 12 миллион евро эвазига олиб келган ва 2023 йилнинг ёзигача шартнома имзолаган эди. Истеъдодли ҳужумчи “Спартак” учун атиги 19 та учрашув ўтказиб, битта гол урган ва иккита голли пас оширган. Кейинчалик икки йил давомида ижара асосида Бразилия чемпионатида “Крузеро” ва “Фламенго” жамоларида тўп тепди.
Ўз навбатида, “Спартак” раҳбарияти ҳам бу футболчини сотиб юборишга қарши эмас. Чунки Роша Россия чемпионатида ўзидан кутилган ўйинни намойиш эта олмаган.
Бундан ташқари, “Спартак” баҳоргача ўз таркибидаги легионерлар сонини Россия премьер-лигаси регламентига мослаштириши керак. Қоидага кўра, бир жамоада саккиз нафардан ортиқ хорижлик футболчини рўйхатдан ўтказиш мумкин эмас.
Айни пайтда москвалик “спартакчилар” сафида тўққиз нафар чет эллик ўйинчи бор. Улардан бири Остон Ўруновдир. Кўпчилик, Ўруновнинг асосий таркибга кира олмаётганини инобатга олиб, қишда биринчи бўлиб, ўзбек футболчисининг бошқа жамоага ўтиши ёки “Спартак-2”га жўнатилишини кутаётган эди.
“Спартак” яқинда Нидерландиядан Йоррит Хендриксни олиб келди. ПСВнинг собиқ ярим ҳимоячисига янги жамоада муайян муддат ўзини кўрсатиш учун имкон берилади. Агар Педро Роша юртига қайтиб кетадиган бўлса, москваликлар сафидаги легионерлар сони регламентга мос келади ва ўзгартириш қилишга ҳеч қандай ҳожат қолмайди.
Масаланинг яна бир томони шундаки, “Спартак” қишки трансферлар вақтида собиқ ҳужумчиси Квинси Промесни қайтармоқчи. Ҳозир улар футболчи ўйнаётган “Аякс” билан бу борада музокара ўтказмоқда. Россияда уни кутишяпти, Квинсининг ўзи ҳам рус диёрига қайтишга қарши эмас. Промес 2014-2018 йиллар давомида “Спартак”да 135 та учрашувда қатнашиб, рақиблар дарвозасига 66 та гол урган. Россия чемпиони бўлган. Тарқатилаётган хабарлар рост чиқиб, Промес Москвага келадиган бўлса, Остон Ўрунов масаласи яна қайта кўтарилади.
Қизиғи шундаки, “Спартак” раҳбарияти ўзбекистонлик легионер бўйича бир қарорга келишга шошилмаяпти. Яқинда “Рубин” расмий таклиф билан Остон Ўруновни трансфер қилишни сўраганида, москваликлар 6 миллион евро талаб қилиб, қозонликларни чўчитиб қўйганди. Кейин “Уфа” Ўруновни олишга ҳаракат қилаётгани ҳақида хабарлар тарқалди. Бироқ, вақт ўтиши билан уфаликлар ҳам ўзбек легионерини ортга қайтаришга клубнинг кучи етмаслигини тан олди.
Айни пайтда Остон Ўрунов “Спартак” билан Бирлашган Араб Амирликларида йиғинда қатнашмоқда. Орада кичик жароҳат олиб, даволаниб, яна сафга қайтди. Шундай бўлса-да, унинг “Спартак”даги фаолияти ҳамон мавҳумлигича қолмоқда.