“Сити”нинг бўлажак юлдузи ўз келажагига болта урди

“Манчестер Сити”нинг келажаги порлоқ дея баҳоланаётган иқтидорли тарбияланувчиси Жоэл Ндала ижарага юборилган жамоаси “Шеффилд Уэнсдей”да жиддий муаммога дуч келди.

19 ёшли футболчи аввал ҳам шунга ўхшаш ҳолат учун огоҳлантирилганига қарамай, сафар учрашуви учун рейсга кечиккан.

Бу воқеадан кейин “Манчестер Сити” ва “Шеффилд Уэнсдей” ҳужумкор футболчи “Хиллсборо”да қоладими-йўқми, шуни ҳал қилиш учун музокараларга тайёргарлик кўрмоқда.

“Манчестер Сити” Жоэл Ндаланинг “Шеффилд Уэнсдей”даги ижара шартномасини футболчига нисбатан интизомий чора сифатида бекор қилиши мумкин.

Кўпчилик томонидан “Манчестер Сити”нинг энг иқтидорли тарбияланувчиларидан бири сифатида баҳоланаётган Жоэл ўтган ёзда асосий жамоада тажриба орттириш мақсадида Чемпионшипга ўтган эди.

У аксарият учрашувларда тезлиги ва техник маҳорати билан ўз иқтидорини намоён қилаётган бўлса-да, майдондан ташқаридаги хулқ-атвори атрофдагиларда хавотир уйғотмоқда.

The Sheffield Star нашри журналисти Алекс Миллер маълумотига кўра, Жоэл Ндала “Шеффилд Уэнсдей”нинг “Сток Сити”га қарши ўйини олдидан сафарга кечиккани учун интизомий жазога тортилган ва яна жазоланиши мумкин.

Хабарларга кўра, 19 ёшли футболчи февраль ойида “Миллуолл”га қарши уй ўйинига ҳам кечикиб келган ва бу ҳолат такрорланмаслиги учун аввал қаттиқ огоҳлантирилган. Аммо ўйинчи яна масъулиятсизлик қилгани боис ҳозир “Шеффилд Уэнсдей” вазиятни қандай ҳал қилишни кўриб чиқмоқда, энг кескин вариант сифатида эса ижара шартномасини бекор қилиш кўрилмоқда.

Агар чоршанба куни шартнома бекор қилинса, Жоэл Ндала Манчестерга қайтиб, мавсум охиргача ёшлар мусобақаларида ўйнайди ва яқин вақтда юқори даражага кўтарилиш имкониятидан айрилади.

Бу эса унинг бозор қиймати ва Нико О’Райли каби футболчилар изидан бориш умидларига жиддий зарба бўлиши мумкин.