Шохназар Норбеков: "Пулга қизиқиб бордим, бошқа хато қилгим келмаяпти"

Шохназар Норбековнинг “Қўқон-1912” жамоасидаги фаолияти якунига етди. Мавсумнинг биринчи қисмини “Металлург”да, иккинчи қисмини қўқонликлар сафида ўтказган ўйинчи янги мавсумни яна бошқа жамоада ўтказади. Ҳозирча унинг хизматига қизиқиш билдираётган клублар бор.

“Суперлигага чиқса яна қайтаман”

- “Қўқон-1912”дан кетишимнинг сабаби про лигадан тушиб кетгани бўлди. Бу ерда шунча йил ўйнадик, юрагимга яқин жамоа. Фақат ҳозир бошқа клублардан таклифлар борлиги учун Суперлигада ўйнаб турамиз. Суперлигага яна чиқса клубга қайтамиз.

“Раҳбарият ҳамма шароитни қилиб берди, афсуски...”

- Футболда кўп нарсани таркиб ҳал қилмайди. Агар ҳаммаси таркиб билан иш битса пули кўп клублар фақат юлдузларни йиғиб олади. Жамоанинг умумий ўйин чизмаси бўлиши лозим. Ҳамма борини берди, аммо дарвозага гол кирмади. Гол урмасак ютолмайсиз. Кейин очко йўқотасиз ва натижада тушиб кетасиз. Ўзимиз вазиятлардан фойдалана олмадик ва хато қилдик. “Қўқон-1912”ни Суперлига билан хайрлашишида кимнидир айбдор қилиш нотўғри. Бунда мураббийлар, футболчилар, ҳамманинг айби бор. Раҳбарият биз учун ҳаммасини қилди, шароитларни яратди, афсуски боя айтганимдек, бунга ўзимиз - мураббийлар штаби, футболчилар, шифокор, массажчи – барчамиз сабабчимиз.

“Бахтиёр ака характеримни билади”

- Янги мавсумни ҳали қайси клубда бошлашим аниқ эмас. Музокаралар кетяпти. Ҳозирча ўзимга яқини “Турон” бўлиб турибди. Бош мураббий Бахтиёр Ашурматов мени яхши билади. Уч йилдан бери барқарор ўйнаётган бўлсак, бунда мураббийнинг ҳиссаси бор. Бахтиёр ака характеримни ҳам билади. Бир-биримизни яхши тушунамиз. Агар четдан яхшироқ таклиф бўлиб қолмаса, “Турон” варианти амалга ошиши мумкин. Бахтиёр ака ҳам агар хориждан яхши таклиф бўлса, бориб ўйнаб келаверасан деганди.

“Малайзия ва Таиланддан таклиф бор”

- Менга Таиланд ва Малайзия клубларидан таклиф бор. Бунгача Индонезияга кетишим аниқ бўлиб қолганди. Бироқ стадионда юз берган нохуш воқеадан кейин муаммолар бор. Унгача менга тайёр шартнома жўнатишганди. Малайзия ёки Таиландга кетиб қолишим мумкин, бу қийин масала. Уларнинг чемпионат савияси паст, барибир уйингда ўйнаганга нима етсин! Четга нима учун борамиз? Оилага ёрдам бериш учун пул топганида. Агар кетишга хоҳиш бўлмаса ўзимизда ўйнаганим яхши.

“Суперлигадан бошқа таклифлар ҳам бор”

- Менга Суперлигадан бошқа таклифлар ҳам бор. Аммо уларни айтсам мақтаниш бўлиб қолмасин. Бир марта “Металлург”га бориб хато қилдим. Пулга қизиқиб бордим. Бошқа хато қилгим келмаяпти. Футбол ўйнаб пешона терим билан пул топгим келяпти.

Шуҳратбек Жўраев.