Шота Арвеладзе: Ҳужумкор ўйинларимиз гуруҳ босқичидан кейин ҳам давом этади

Хабарингиз бор, эртага “Пахтакор” Осиё чемпионлар лигаси гуруҳ босқич 4-турида “Ал-Ҳилол”га қарши ўйнайди. Бугун ушбу учрашувдан олдин матбуот анжумани ташкил этилди. Қуйида “шерлар” бош мураббийи Шота Арвеладзенинг ўйин олди фикрлари билан танишиб олишингиз мумкин.

-Ўйинга яхши тайёргарлик кўришга ҳаракат қилдик. Футболчиларга кўпроқ дам берган ҳолда машғулотларни ташкил этдик. Одатда ҳар 3-4 кунда бўладиган ўйинларда бир хил машғулотлар ўтказилади.

Бундай қисқа муддатда ўтказиладиган ўйинларда ҳар сафар бир ҳил ўйин кўрсатиб бўлмайди. Балки, ҳар сафар нимадандир хулоса чиқарган ҳолда майдонга тушиш керак. Мен шогирдларимга ишонаман, улар ҳужумкор ўйин намойиш эта олишади. Бизнинг ёрқин ўйинларимиз нафақат қолган 3 та ўйинда, балки, гуруҳ босқичидан кейинги баҳсларда ҳам давом этади.

"Ал-Ҳилол" индивидуал тарзда ҳам, жамоавий тарзда ҳам кучли деб айтган бўлардим. Улар керак пайтда ҳимояда яхши ўйнайди, керак пайтда эса дарвозабон ҳужумларни бошлаб берди. Бу жиҳатдан "Ал-Ҳилол"ни бизнинг жамоага ўхшатган бўлардим.