Шомуродов, сен кетсанг, “заҳримни” кимга сочаман? Раньери яна нималар деди?

Элдор Шомуродов Европа Лигаси умумий босқичининг сўнгги учрашуви қаҳрамонларидан бири бўлди. “Рома”нинг “Айнтрахт”га қарши ўтказган муҳим беллашувида ўзбек ҳужумчиси захирадан майдонга тушиши билан гол уриб, жамоасининг ғалабасини таъминлади.

“Рома” кейинги босқичга чиқишни муваффақиятли уддалаганидан кейин бош мураббий Клаудио Раньери Sky Sport нашрига интервью бериб, Элдор Шомуродовнинг келажагига ҳам ойдинлик киритди.

Sports.uz портали ушбу интервьюни ўзбекистонлик футбол ишқибозлари эътиборига ҳавола этади.

- Рақибнинг ўта кучли эканини инобатга олиб, катта босимни қандай қилиб енгдингиз?

- Бунақаси муҳим учрашувларда буюк ўйинчиларгина кўзга ташланади. Ана шундай муҳим ўйинчилар масъулиятни ўз зиммасига олиб, қолган жамоадошларини ҳам ўз ортидан эргаштиради.

Биз бу учрашувда ҳимояда эҳтиёткор бўлдик, чунки рақибнинг ўткир қарши ҳужумларидан чўчидик, улар шу усулда ўйнашини олдиндан билардик.

Йигитларга балли, улар тўп билан тезкор равишда ишлади, кейин гол уришга эришдик.

- Жаҳон чемпиони Матс Хуммельс техник сабабларга кўра ўйнамаётган эди, ҳозир қанотда самарали ҳаракат қилаётган Анжелино аслида марказий ҳимоячи. Уларга муносиб жой топиб бериш қийин бўлмадими?

- Мен футболни қандай кўрсам, шундай ишлайман. Бу футболчилар ҳозир қўйилган ҳудудларда ўйнашга кўниккан. Илгари Хуммельсни рақиб сифатида ҳурмат қилардим. Буюк ўйинчи. Жуда ақлли. Жамоада ҳаммага ўрнак.

Мен унга “Римда қолишинг керак, кам ўйнаётган бўлсанг ҳам сен жамоани майдонда сен бошқарасан, ҳатто сен машғулотни қандай ўтказаётганинг ҳам биз учун жуда муҳим”, - дедим. Қолган футболчиларга ўз саломатлигига қайғуришни ва пул ишлашни Хуммельсдан ўрганишни тавсия қилдим.

- Охирги икки учрашув Элдор Шомуродовнинг келажагини ўзгартирадими?

- Мен унга биз билан қолишини айтдим. Ҳамма ўйинчилар уни яхши кўради, мухлислар ёқтиради, чунки Элдор ҳар доим борини бериб ўйнайди.

Шомуродов менинг қўл остимда “Кальяри”да ўйнаган ва бу йигит мен учун жуда муҳим аҳамиятга эга ўйинчи. Энг ёқадиган томони, у ҳамиша табассум қилиб туради.

Баъзан унга жаҳл қиламан, шунинг учун “Шомуродов, агар кетиб қолсанг, мен заҳримни кимга сочаман?”, дедим.

- Энди “Рома”ни фаворитлар қаторига қўшса бўладими?

- Келишимдан аввал, ҳамма “Рома”нинг мусобақадан чиқиб кетишидан хавотирланиб юрганди, энди бизни Европадаги фаворитлар қаторига қўшяпсизми? Келинг, ҳеч нарсани ваъда қилмаган ҳолда, ҳаммасига босқичма-босқич эришишга ҳаракат қилайлик.  Биз ҳар доим қўлимиздан келганича ҳаракат қиламиз. Биз ўсишнига эришяпмиз ва буни давом эттириш керак.

Шогирдларимнинг барчаси мен учун муҳим ўйинчилар ва улар жамоа учун бор кучини сарфлаяпти. Бу ҳолатнинг мураббийга ҳам аҳамияти катта. Чунки уларнинг ҳар бирига ишонишинг мумкинлигини биласан.

Энг муҳими, камтарин бўлиб қолиш. Камтар бўлсак, ҳамма нарсага эришамиз. Оёқ ердан узилмагани маъқул.

“Рома” Европа Лигасининг умумий босқичини 15-ўринда якунлади. Энди плей-оффда нимчорак финалга чиқиш учун ўтиш ўйинида қатнашади. Клаудио Раньери шогирдларига Венгриянинг “Ференцварош” ёки Португалиянинг “Порту” жамоаларидан бири рўбарў бўлади.

 

Гол уриб, “Рома”ни кейинги босқичга олиб чиққан Шомуродовнинг ўйини қандай баҳоланди?