Қашқадарё вилояти ҳокими “Насаф” жамоаси билан учрашди

Бугун Қашқадарё вилояти ҳокими бошчилигидаги вилоят раҳбарлари Чемпионлар Лигаси Элит мусобақаси старти олдидан “Насаф” жамоаси билан учрашди. Вилоят ҳокими Муротжон Азимов жамоанинг нафақат вилоят, балки бутун Ўзбекистон шарафини ҳимоя қилувчи байроқдор жамоа эканлигини таъкидлади. У жамоа бу мавсумда Суперлигада чемпионликни сақлаб қолиш билан бирга, халқаро майдонда ҳам муносиб иштирок этиши кераклигини билдирди.

Жамоа бош мураббийи Рўзиқул Бердиев яратилган шарт-шароитлар учун миннатдорчилик изҳор қилиб, қўйилган вазифаларни юқори даражада бажаришга ҳаракат қилишларини айтди. Клуб президенти Шуҳрат Асланов жамоа олдида масъулиятли вазифалар турганини, лекин бу йўлда дадил қадам ташлаш зарурлигини таъкидлади. Сўнгги йилларда “Насаф”дан миллий ва ёшлар терма жамоаларига муносиб футболчилар етишиб чиқаётгани алоҳида эътироф этилиб, бу йўналишни янада ривожлантириш муҳимлиги қайд этилди.

Жамоа сардори Умарбек Эшмуродов ва дарвозабон Абдувоҳид Неъматов вилоят раҳбарияти ва ҳомийларга жамоа номидан миннатдорчилик билдирди.

“Насаф” футбол мактаби қошида янги майдонлар очилди.

Қашқадарё вилояти ҳокими Муротжон Азимов бошчилигидаги вилоят раҳбарлари ташрифи чоғида “Насаф” футбол мактаби қошида янги сунъий қопламали майдонларнинг очилиш маросими бўлиб ўтди. Тантанали маросимда “Насаф” жамоаси аъзолари ва футбол мактабининг ёш тарбияланувчилари иштирок этди. Вилоят ҳокими, шунингдек, вилоят футбол ассоциацияси президенти Муротжон Азимов ёш футболчиларга омад тилаб, уларни “Насаф” жамоаси аъзоларидек муваффақиятли бўлишга ундади.