"Персеполис" бош мураббийи: Остон Ўрунов асосий таркибга кириш учун аввалги формасини тиклаши керак!

Яқинда Эроннинг "Персеполис" жамоаси бош мураббийи ўзгарди. Қониқарсиз натижалар сабаб Воҳид Ҳошимян истеъфога чиқарилиб, унинг ўрнини бразилиялик Осмар Виера эгаллади. 

Виера легионеримиз Остон Ўрунов ҳақида фикрларини билдирди. У Ўруновнинг фаолиятида пасайиш бўлаётганини таъкидлади.

"Ўруновнинг фаолияти икки йил аввалгига нисбатан анча пасайиб кетди ва мен ҳозир Ўруновни кўрмаяпман! У "Персеполис"нинг асосий таркиб футболчисига айланиши учун аввалги Остон версиясига қайтиши керак", - деди 50 ёшли мутахассис.

Эслатиб ўтамиз, Ўрунов жароҳатлар сабаб ўтган мавсумнинг катта қисмини ўтказиб юборган эди. У жорий мавсум Эрон Про-лигасида 8 та ўйин ўтказиб, битта голли узатмани амалга оширди.