Ўзбекистон терма жамоаси етакчиларининг Каннаваро мураббийлигига муносабати қандай?

Ўзбекистон миллий терма жамоаси 2026 йилнинг ёзида АҚШ, Канада ва Мексика биргаликда мезбонлик қиладиган футбол бўйича навбатдаги жаҳон чемпионатида иштирок этади.

Футболчиларимиз мамлакат тарихида илк бор мундиалга йўлланма олгани учун бўлажак мусобақа биз учун тарихий аҳамият касб этади.

Айни пайтда Ўзбекистон футбол ассоциацияси терма жамоани футбол оламининг энг нуфузли турнирига муносиб тайёрлайдиган хорижлик мутахассис қидирмоқда. Ассоциация мутсаддилари бир неча номдор мураббийларга мурожаат қилди. Охир-оқибат италиялик Фабио Каннаваро терма жамоамиз билан ишлашга розилик бергани айтилмоқда.

Ҳали футболда мураббий сифатида бирор ютуқни қўлга киритмаган ва терма жамоалар билан ишлаш тажрибаси Хитойнинг икки ўйини билан чекланадиган мутахассиснинг жаҳон чемпионатда қатнашишга ҳозирлик кўраётган терма жамоага бош мураббий бўлиши жуда кенг муҳокамаларни келтириб чиқарди.

Ўзбекистон футбол ассоциацияси бу шов-шувлар фонида Фабио Каннаваро билан музокаралар олиб бораётганини тасдиқлади.

Айни пайтда бу масалани турли даражадаги мутасаддилар, мутахассислар, мураббийлар ва футболчилар кенг муҳокама қилмоқда. Хусусан, миллий терма жамоамиз етакчиларидан ҳисобланган Рустам Ашурматов ҳам бу масалади ўз қарашлари билан ўртоқлашди.

- Фабио Каннаваро Ўзбекистон терма жамоасини бошқариши ҳақида ёзишяпти, лекин бу ҳали расмий тасдиғини топган йўқ. Аслида бундан кейин ҳам Тимур Кападзе билан ишлашни хоҳлардик, чунки айнан мана шу  мураббий билан бирга жаҳон чемпионатига йўлланма олдик.

Энди нима бўлишини кутамиз. Фабио Каннаваро ҳақида бирор нарса дейишим қийин. Унинг фаолиятини кузатмаганман, қаерда ва қандай ишлаганини билмайман, - деди Рустам Ашурматов Россиянинг championat.com сайти мухбири Владислав Круглов билан  суҳбатда.

Эслатиб ўтамиз, Ўзбекистон миллий терма жамоаси 2026 йилги жаҳон чемпионатиг саралаш мусобақаларининг катта қисмини Сречко Катанец бошчилигида ўтказди. Бироқ словениялик мураббий саломатлигида муаммо келиб чиққани боис, бош мураббийликка Тимур Кападзе таклиф этилди.

Футболчиларимиз учинчи саралаш босқичидаги энг муҳим ва охирги ўйинларини айнан Кападзе қўл остида ўтказиб, уммонортида бўладиган жаҳон чемпионатига йўлланмани нақд қилди.

Шунингдек, Ўзбекистон миллий терма жамоаси сентябрь ойида “CAFA Nations Cup 2025” халқаро турнирида ғолиб чиқди. Бу мусобақада ҳам футболчиларимизга Тимур Кападзе устозлик қилди.

Ҳурматли ўқувчилар, Сиз нима деб ўйлайсиз, Ўзбекистон миллий терма жамоасини бўлажак жаҳон чемпионатига ким тайёрлагани маъқул? Фикрларингизни изоҳларда қолдиринг!

 

Испанияда ўйнаган юлдуз Ўзбекистонни қабул қилаётган Каннаварога ўзгача мурожаат қилди

Тезкор: Ҳусанов ҳақида нохуш хабар!

Кутилмаган вазият: Буёғига Ҳусанов анча қийналадиган бўлди!