Ойбек Рустамов ОКМКни тарк этди. Бу ҳақда Олмалиқ клуби матбуот хизмати хабар берди.
"Барчаси учун раҳмат, Ойбек!
ОКМК ФК жамоаси ва ярим ҳимоячи Ойбек Рустамов ўртасидаги шартнома ўзаро келишувга асосан бекор қилинди.
Ҳуқуқий жиҳатдан "Қўқон-1912" клубига тегишли бўлган футболчи 2023 йил бошидан буён "кончилар" сафида ижара асосида тўп суриб келаётганди. Шартнома бандларига мувофиқ, ижара муддати якунига етгач, Ойбек Рустамов водий жамоаси ихтиёрига қайтди.
Иқтидорли футболчи уч йиллик фаолияти давомида Олмалиқликлар либосида 83 та учрашувда майдонга тушиб, майдон марказида юқори прессинг, ўйин қуришдаги фаоллиги ҳамда етакчилик фазилатлари билан ажралиб турди ва 6 бор рақиб дарвозасини ишғол этиб, жамоа натижаларига муносиб ҳисса қўшди.
ОКМК ФК Ойбек Рустамовга жамоа сафидаги самарали фаолияти учун миннатдорчилик билдиради ва келгуси фаолиятида омад тилайди", - дейилади хабарда.
Футболчининг кейинги манзили Қаршининг "Насаф" жамоаси бўлиши кутилмоқда.