Ўрунов Машариповдан чемпионликни тортиб олди ёхуд яна қайси футболчиларимиз Эронни забт этган?
- 4-июн 2024, 23:45
- Zohir Toshxo’jayev
- 1
- Футбол
сЭрон клублари қишда Қатарда ўтказилган Осиё кубогидан порлаган Ўзбекистон миллий терма жамоаси ўйинчиларини ўз сафига қўшиб олганидан кейин ўзбекистонлик футбол ишқибозлари ушбу мамлакат чемпионатига эътибор қаратди.
Форсларнинг икки етакчи клуби – “Истиқлол” ва “Персеполис” икки ўйинчимиз – Жалолиддин Машарипов ва Остон Ўруновни ўз сафига қўшиб олди.
Аутсайдерлардан бири ҳисобланган Хузистоннинг “Истиқлол” жамоаси юқори дивизиондаги ўрнини сақлаб қолиш учун ўзбекистонлик ҳимоячи Достон Турсунов ёрдамидан фойдаланди.
Жалолиддин Машариповнинг “Истиқлол” жамоаси узоқ муддат мусобақа жадвали пешқадами бўлиб келди. Бироқ чемпионат якунланишига уч тур қолганида қуйи поғонадаги клублардан бири “Нассаджи” билан очко бўлишди. Худди ўша турда Остон Ўрунов сўнгги сонияларда “Истиқлол” (Хузистон) дарвозасини ишғол қилиб, учта тўп фарқи билан ортда қолаётган жамоасининг камбэки ва ғалабасини таъминлади.
“Персеполис” қолган икки турда бир очколик фарқни сақлаб қолди ва Эрон чемпиони бўлди. Жамоа сафида 13 та учрашувда майдонга тушган Остон Ўрунов олтита гол уришга муваффақ бўлди ва мавсумни олтин медаль билан якунлади.
Жалолиддин Машарипов “Истиқлол” таркибида 14 та ўйинда иштирок этди ва ўз ҳисобига иккитагол ёздириб қўйди. Тажрибали футболчимиз кумуш медалга лойиқ кўрилди.
Ўн иккита беллашувда қатнашган ҳимоячимиз Достон Турсунов Хузистоннинг “Истиқлол” жамосига Профессионал лигадаги жойини сақлаб қолишга ёрдам берди.
Умуман олганда, февраль ойида Эрон чемпионатига йўл олган ҳар учала легионеримиз учун ҳам мавсум муваффақиятли ўтганини таъкидлаш лозим.
Шу ўринда, Эрон чемпионати ўзбекистонлик чарм тўп усталари учун кўпинча муваффақиятли келган ва бу яхши анъанага айланган.
Форслар заминида чемпионликни биринчи бўлиб қўлга киритган футболчимиз Фосил Мусаев бўлган. 2015-2016 йиллар давомида “Сепахон” учун 40 та учрашувда иккита гол ва тўртта ассист қайд этган.
Кейинги йилларда ўзбек футболчилари мунтазам Эронда чемпион бўлган жамоаларда бош соврин соҳиби бўлди. Дастлаб, 2021-2022 йиллари Эрон Про-лигасида тўп тепган Азизбек Амонов “Истиқлол” жамоаси билан чемпионат ғолибига айланган. Кейинги йили “Персеполис” шарафини ҳимоя қилган яна бир ҳужумчимиз Шерзод Темиров ҳам чемпионлик унвонига сазовор бўлди.
Мана энди уларнинг ғалабали йўлини Остон Ўрунов давом эттирди.
Халқаро майдонда эса, Эрон ва Ўзбекистон терма жамоалари 2026 йилги жаҳон чемпионатининг саралаш турнирида бир гуруҳда беллашмоқда. Тошкентдаги дастлабки учрашувда 2:2 ҳисобида дуранг қайд этилган. Энди 11 июнь куни ҳар икки терма жамоа Теҳронда бир бири билан куч синашади.
Шомуродовга янги харидор чиқди!
Шомуродовни олиш осон бўлмаяпти...