ОКМК футбол клуби янги мавсум олдидан режалаштирилган дастлабки хориж йиғинини муваффақиятли тарзда якунлаб, бугун Тошкентга қайтиб келди. Жамоа 18–31 январь кунлари Бирлашган Араб Амирликларида бўлиб, у ерда жисмоний ҳолатни яхшилаш ҳамда тактик ишланмаларни чуқурлаштиришга қаратилган машғулотлар олиб борди.
Йиғин давомида мураббийлар штаби футболчиларнинг умумий тайёргарлигини баҳолаб, жамоавий ўйин механизмларини такомиллаштириш ва янги тактика элементларини амалиётда синаб кўришга алоҳида эътибор қаратди. Машғулотлар юқори интенсивликда ўтди ва футболчиларнинг функционал ҳолатини оптимал даражага олиб чиқиш асосий мақсадлардан бири бўлди.
Икки ҳафталик интенсив машғулотлардан сўнг жамоа аъзоларига уч кунлик қисқа танаффус берилди. Шундан сўнг ОКМК тайёргарликнинг навбатдаги муҳим босқичига киришади. Хусусан, 4 февраль куни эрта тонгда жамоа Туркиянинг Анталия шаҳрига йўл олади.
Анталиядаги йиғин 18 февралга қадар давом этади. Ушбу босқич доирасида "Кончилар" бир қатор назорат учрашувларини ўтказиши режалаштирилган бўлиб, мазкур беллашувлар янги мавсум олдидан жамоанинг умумий тайёргарлик даражаси ҳамда таркиб имкониятларини баҳолашда муҳим аҳамият касб этади. Рақиблар ва ўйинлар тақвими бўйича батафсил маълумотлар яқин кунларда эълон қилинади.