Очко йўқотилишида Мбаппе ва Винисиус айбдорми?

Мадриднинг “Реал” жамоаси бош мураббийи Альваро Арбелоа жамоанинг муаммолари ҳақида фикр билдирди. У Ла Лиганинг 31-турида “Жирона” билан 1:1 ҳисобидаги ўйиндан кейин етакчи ҳужумчилар — Килиан Мбаппе ва Винисиус Жуниорнинг формаси ҳақидаги саволга жавоб берди.

- Мбаппе ва Винисиуснинг самарадорлиги тушиб кетгани ҳақида нима дейишим мумкин? Мен дунёдаги энг яхши 4-5 ўйинчилар қаторига кирадиган ва бундай кўрсаткичларга эга икки футболчи учун хавотир ололмайман.

Биз бутун жамоа ўйинини яхшилашимиз керак. Чунки ҳимояда ўйнайдиган рақибларга қарши натижа кўрсатишда қийналяпмиз. Бу кўпроқ жамоавий ҳаракатларга боғлиқ, индивидуал кўрсаткичларга эмас, - деди Альваро Арбелоа AS нашри журналистига.

Жорий мавсумда 25 ёшли Винисиус 46 ўйинда 17 та гол ва 13 та голли узатма берган. Испания чемпионатининг сўнгги 6 учрашувидан фақат биттасида у 2 та гол урган холос.

27 ёшли Мбаппе ҳисобида 38 ўйин, 39 та гол ва 6 та ассист бор. У февралдан бери Ла Лигада гол ура олмаяпти.