Можаро Умаровнинг Европадаги фаолиятига чек қўйиши мумкин!
- 22-феврал 2022, 09:17
- Zohir Toshxo’jayev
- 0
- Футбол
Беларусь олий лигасининг янги мавсумига тайёргарлик кўраётган БАТЭ клуби жиддий муаммога дуч келди.
Оммавий ахборот воситалари жамоанинг етакчи ўйинчиси Шаҳбоз Умаров ва янги тайинланган бош мураббий Александр Михайлов ўртасида зиддият келиб чиққан. Бу ҳақда sports.uz портали ҳам хабар берган эди.
Умаров ўйнамаса ким хавфли вазият яратади? Шаҳбознинг жамоадан четлатилгани БАТЭ мухлисларига ёқмади!
Айни пайтда бу можаро қандай якун топиши кўпчиликни қизиқтирмоқда. Чунки БАТЭ олдига бошланаётган чемпионатда ғолиб чиқиш вазифаси қўйилган ва Шаҳбоз Умаров бу жамоанинг хавфли ҳужумларини ташкил этадиган ва муҳим голларини урадиган ўйинчиси эканини ўтган мавсумдаёқ исботлаб қўйди.
Юзага келган зиддиятга ушбу мамлакат футболини ёритадиган таниқли журналистлар ҳам ўз фикр-мулоҳазаларини билдирмоқда. Хусусан, Николай Ходасевич ҳам ўз каналлари орқали БАТЭда юз берган ҳолат бўйича ўз муносабатини қуйидагича билдирди:
- Албатта, янги бош мураббий, мураббийлар штаби жамоада ким “хўжайин” эканини кўрсатиб қўйиш учун Умаров даражасидаги муҳим ўйинчини ҳам четлатиги, жазолаши ва керак бўлса, сотиб юбориши мумкин.
Лекин бу масалада кўп нарса БАТЭнинг тажрибали ўйинчилари қандай қарорга келишига боғлиқ. Чунки замонавий футболда бир мураббийдан жамоавий фикр устун туради. Хўш, тажрибали футболчилар Умаровни қўллайдими? Аслида бирор қарорга чиқаришдан олдин мана шу жиҳатларни ўйлаб кўриш керак эди.
Агар Борисов жамоасининг “оқсоқол” ўйинчилари Шаҳбозни қўллаб-қувватласа, муайян босқичгача уни кечириш мумкин. Уни сотиб юбориш сўнгги чора. Аслида Умаров БАТЭга мўмай даромад келтирадиган актив ҳисобланади. Лекин ҳозир уни қайси жамоага сотиш ёки ўтказиш мумкин? Шошилинч тарзда Қозоғистон жамоаларидан харидор топса бўлади. Бироқ улар БАТЭнинг асосий активига ҳам борисовликларни қониқтирадиган суммани бермайди.
Менимча, Умаровни кечиришади. Унинг характери мураккаб, бир куни портлаши, эртасига ўзига келиб, узр сўраши ҳам катта эҳтимол. Шаҳбоз ҳиссиётга бой йигит ва бир суткада бир неча саргузаштга аралашиб қолиши мумкин.
Бу ҳолатда кўп нарса, жамоага боғлиқ, мураббий эса шогирдлари олдида биринчи жиддий синовдан ўтади, - дейди Николай Ходасевич.
Таъкидлаш жоизки, Шаҳбоз Умаров Ўзбекистон Суперлигасида ўзини кўрсата олмаганини унинг мураккаб характери билан изоҳлашади. У омадини қидириб, икки йил аввал Беларусьга йўл олганди. “Энергетик-БГУ”да маҳоратини намойиш этган легионеримизни мамлакатнинг энг қудратли клубларидан ҳисобланган БАТЭ ўз сафига қўшиб олди. Ўтган мавсумда ҳамюртимиз борисовликлар сафида олтита гол ва еттита голли пас билан энг зўр ўйинчилардан бири бўлди.
Умаров ҳам ўз истеъдоди ва салоҳиятига таянган ҳолда Европанинг кучлироқ лигаларида ўйнашни орзу қилади. Шаҳбоз бунга лойиқ, эканига ҳеч-қандай шак-шубҳа йўқ. Бироқ, ўйинчи фаолиятидаги турли зиддият ва можаролар унинг келажагига салбий таъсир қилиб қолиши мумкин.
Сўнгги маълумотларга қараганда, ҳали БАТЭдаги мураккаб вазиятга ойдинлик киритилгани йўқ. Демак, вазиятни кузатишда давом этамиз...