Миллионлар эвазига бошқа клубга кўчиб ўтган мураббийлар! Бу рўйхат сизни ҳайрон қолдиради!

«РБ Лейциг» клуби Юлиан Нагельсманни «Бавария»га қўйиб юбориши эвазига 25 миллион евро ишлаб олганидан хабарингиз бор. Аввалига, мюнхенликлар ёш мутахассисни қўлга киритиш мақсадида 20 миллион таклиф этди, лекин рад жавобини олди. Шунга қарамай, «ФК Голливуд» ўз мақсадига етди. Хўш, бундай ҳолатлар аввал ҳам футбол оламида кузатилганми? Энг катта сумма эвазига бошқа жамоага қўйиб юборилган мураббийлар ким? Шу ва бошқа саволларга бугун жавоб бериб ўтишга ҳаракат қиламиз.

25 миллионлик мураббий!

Аслида, бу сумма қоғозда, холос. Барча бонуслар берилган тақдирдагина умумий қиймат 25 «лимон»ни кўрсатиши шартномада белгилаб қўйилган. Шундай бўлсада, Жозе Моуриньонинг рекордини янгилаш учун шунинг ўзи кифоя. «Буқалар» мураббийи воқеалар ривожи бундай тус олганидан хурсанд эканлигини яшириб ўтирмади.

«РБ Лейпциг»даги фаолиятим давомида футболчилар билан биргаликда ажойиб дамларни бошдан ўтказдим. Бу ерни юракдаги оғир дард билан тарк этаман, лекин бахтлиман. Менга ўзгача жамоани бошқариш имконини тақдим этишди. Кўплаб китобларнинг асосий мавзусига айлаган «Бавария»да фаолиятимни давом эттириш мен учун шараф.

ЕЧЛ ярим финалига қадар етиб борганимизни ҳеч қачон унутмайман. Бу ҳаётимдаги энг ширин дамлар бўлган. Ҳозир хайрлашишга эрта. Амалда, «РБ Лейпциг» аъзосиман. Афсуски, ёзда кетаман. Ҳеч қачон «Бавария» бош мураббийи курсисига бўлган иштиёқимни яширмаганман. Бу фантастик имконият! «Буқалар» раҳбарларидан миннатдорман. Ўз вақтида, мени қўйиб юборгани ва мюнхенликларнинг таклифига рози бўлгани учун. Барча-барчага раҳмат!»

Футбол оламидаги энг қиммат мураббий

Мураббийлар билан шартнома имзолаш учун клубларнинг пул тўлаши футбол оламида ҳар куни ҳам учрайвермайди. Ҳозирда клублар ишсиз мутахассислар билан шартнома имзолашни афзал кўради. Шунингдек, мутахассисларнинг 65 фоизида ўзи истаган кетиш ҳуқуқини берувчи бандларга эга шартномалар мавжуд. Нагельсманн эса, қолган 35 фоиз мураббийлар қаторида эди. Мюнхен жамоаси раҳбарлари янги эрани бошлаш мақсадида айнан Юлиан Нагельсманни танлади. Ҳатто, 25 миллион евро ҳам уларни қароридан қайтаргани йўқ.

Эътиборлиси шундаки, »РБ Лейпциг« ҳам ўз вақтида Нагельсманнинг шартномасини сотиб олган эди. 2018 йилда »буқалар« »Хоффенхайм« мураббийи учун 5 миллиондан воз кечади. 2018/19 йилда эса, уни клубга олиб келади. Энди эса, »Бавария«га 5 баробар фойда билан қўйиб юборди. Бундан кўриниб турибдики, 33 ёшлик мутахассиснинг трансфер суммаси аллақачон 30 миллиондан ортиб кетди.
Сўнгги йилларда немис клублари бу ҳолатни урфга киритди. Мисол тариқасида »Боруссия М«ни »Боруссия« Дортмундга 5 миллион евро эвазига алмаштирган Марко Розени кўрсатиш мумкин. Ёзда мураббий Дортмундга кўчиб ўтади. »Боруссия М« Розенинг ўрнини 7,5 миллион евро эвазига »Айнтрахт« клуби мураббийи - Адольф Хюттер билан тўлдиради. Бир мавсумнинг ўзида Бундеслиганинг 3 клуби янги мураббий учун компенсация тўламоқда.

Бу ҳолат аввал ҳам содир бўлган. «Трансфермаркт» портали берган маълумотларга кўра, шу кунга қадар 13 мураббий бошқа жамоага пул эвазига кўчиб ўтган. Уларнинг энг камми 5 миллион евро клуб ғазнасига туширган. Биринчилардан бўлиб »Манчестер Сити« бундай трюкни амалга оширади. 2008 йилда »Блэкберн«га »Сити« Марк Хюзнинг шартномасини бекор қилиш мақсадида 5 миллион фунт тўлаб берган. 1,5 йил давомида жамоани бошқарган Марк 2009/10 йилги мавсум ўртасида ўз ўрнини Роберто Манчинига бўшатиб берди.

Нагелсман трансфери учун икки клуб пул тўлаган ягона мутахассис эмас. Ундан аввалроқ Брендон Рожерс бу йўлни босиб ўтган. Аввалига (2012 йилда) »Суонси« уни »Ливерпуль«га 6.2 миллион эвазига қўйиб юборган бўлса, кейинроқ »Лестер« (2019 йилда) »Селтик"ка шимолий ирландиялик учун 10 миллион тўлади.

Юлиан Нагелсманга қадар Жозе Моуриньо бу рўйхатни 10 йилдан ортиқ бошқариб келди. Португалиялик «Интер» билан амалга оширган треблидан сўнг, «Реал» Мадридга таклиф этилди. Миланликлар «Реал»га 16 миллион евро сабаблигина Жозени қўйиб юборади. Орадан бир йил ўтгач, Роман Абрамович «Порту»га Андре Виллаш-Боаш учун 15 миллион евро тўлаб берди. Ўтган йили эса, «Спортинг» раҳбарлари «Брага» устози - Рубен Аморим учун 10 миллиондан воз кечди. Эътиборлиси шундаки, бу иш ўзини оқлади. Жорий мавсум якунида Рубен «шерлар»ни Португалия чемпионлиги сари дадил бошлаб борди.

Футбол оламида амалга ошган барча мураббийлар трансфери

11-13 ўрин. Юлиан Нагельсманн (Германия) — «Хоффенхайм»дан «РБ Лейпциг»га 2019 йилда 5 млн евро

11-13 ўрин.Петер Бош (Нидерландия) — «Аякс»дан «Боруссия Д»га 2017 йилда 5 млн евро

11-13 ўрин. Марко Розе (Германия) — «Боруссия М»дан «Боруссия Д»га 2021 йилда 5 млн евро

10 ўрин. Маурицио Сарри (Италия) — «Челси»дан «Ювентус»га 2019 йилда 5.5 млн евро

9 ўрин. Рональд Куман (Нидерландия) — «Саутгемптон»дан «Эвертон»га 2015 йилда 6 млн евро

7-8 ўрин. Брендан Роджерс (Шимолий Ирландия) — «Суонси»дан «Ливерпуль»га 2012 йилда 6.2 млн евро

7-8 ўрин. Марк Хьюз (Уэльс) — «Блэкберн»дан «Манчестер Сити»га 2008 йилга 6.2 млн евро

6 ўрин. Адольф Хюттер (Австрия) — «Айнтрахт Ф»дан «Боруссию М»га 2021 йилда 7.5 млн евро

5 ўрин. Рубен Аморим (Португалия) — «Брагa»дан «Спортинг»га 2020 йилда 10 млн евро

4 ўрин. Брендан Роджерс (Шимолий Ирландия) — «Селтик» дан «Лестер»га 2019 йилда 10.5 млн евро

3 ўрин. Андре Виллаш-Боаш (Португалия) — «Порту»дан «Челси»га 2011 йилда 15 млн евро

2 ўрин. Жозе Моуриньо (Португалия) — «Интер»дан «Реал»га 2010 йилда 16 млн евро

1 ўрин. Юлиан Нагельсманн (Германия) — «РБ Лейпциг»дан «Бавария»гa 2021 йилда 25 млн евро