Лучано Спаллетти: "Бу ғалаба жамоага ишонч олиб келди"

"Ювентус" бош мураббийи Лучано Спаллетти Италия А Сериясининг 15-тури доирасида "Болонья" устидан қозонилган 1:0 ҳисобидаги ғалабадан сўнг фикр билдирди.

— Бу "Ювентус"га келганимдан бери энг муҳим ғалабами? Албатта. Чунки бизга жуда кучли жамоа қарши турди. Улар сифатли, иштиёқли, яхши ташкил этилган ва ҳатто бир киши кам ҳолда ҳам бизга муаммо туғдиришди. Уларда кучли характер бор.

Бугун футболчиларимни албатта мақташим керак. Машғулотларда ижобий жиҳатларни кўраётгандим. Футболчилар серғайрат ва фаол кўринаётган эди, энди эса уларга руҳий мувозанат берадиган ўйин намойиш этиш зарур эди. Бугун "Ювентус" ҳақиқатан ҳам ўйин ичида бўлди.

Кабаль интуицияга эга футболчи. У вақти-вақти билан ҳис-туйғуларини назорат қилишни ўрганиши керак, чунки у жуда эмоционал. Унда тезлик ҳам, куч ҳам бор. Истеъдод фақат тўпни пошна билан узатиш эмас, балки 100 метрни тўлиқ тезликда босиб ўтиш ҳам истеъдоддир. У ҳаводаги курашларда жисмонан кучли, яккама-якка вазиятларда ҳам ютқазмайди, аммо ҳозирча айрим пайтларда беэътиборликка йўл қўяётган эди. Мен уни бироз "жиғига тегдим", — деди Спаллетти.