“Ливерпуль” биттада тўрт юлдуздан воз кечди

Жорий мавсум Англия чемпионлиги унвонини муносиб ҳимоя қила олмаган “Ливерпуль” ёзда таркибни жиддий янгилашга тайёрланмоқда.

The Sun нашри маълумотига кўра, яқинлашиб келаётган ёзда жамоанинг сўнгги йиллардаги энг зўр тўпурари Муҳаммад Салоҳ клубни тарк этиши аниқ бўлган масала.

Бироқ бу йўқотиш ҳали ҳаммаси эмас. Манбага кўра, клуб Жо Гомес, Алексис Мак Аллистер, Федерико Кьеза ва Коди Гакпони ҳам трансферга қўяди.

Шунингдек, ярим ҳимоячи Кёртис Жонснинг жамоадаги келажаги ҳам ноаниқ бўлиб қолмоқда. Бундан ташқари, ҳимоячи Эндрю Робертсон ёзда эркин агент сифатида жамоани тарк этиши кутилмоқда.

Аввалроқ,  “Ливерпуль” бош мураббийни алмаштириб, жамоа бошқарувига ишсиз юрган Хаби Алонсони тайинлаши мумкинлиги ҳақида хабарлар чиққан эди. Ҳозирги пайтда “Ливерпуль” Премьер-лига жадвалида бешинчи ўринни эгаллаб турибди ва Европа Чемпионлар лигасининг янги мавсуми йўлланмаси учун курашмоқда.