Левандовски икки топ-клубдан чорлов олди

“Барселона” билан шартномаси тугаб бораётган 37 ёшли ҳужумчи Роберт Левандовски келаси ёзда эркин агент сифатида жамоани тарк этиши мумкин.

Польшалик футболчига ҳали янги шартнома таклиф этилмади. Робертнинг ўзи Каталонияда қолиш учун маошининг катта қисмидан воз кечишга тайёр. Бироқ клуб ҳали ҳам якуний қарорга келгани йўқ.

Журналист Николо Скиранинг маълум қилишича, тажрибали тўпурарга Италиянинг икки машҳур клуби – “Ювентус” ва “Милан”дан сўров келган.

Ҳар икки клуб ҳужумчи атрофидаги вазиятни кузатмоқда ва Левандовски “Барса”дан кетадиган бўлса, у билан дарҳол музокараларни бошлашга тайёр.

Роберт Левандовскига “Чикаго Файр” ҳам аниқ таклиф юборган. Бундан ташқари, Левандовски Туркия ва Саудия Арабистони клублари нишонида турибди.