Кунде "Эл-класико"гача тўлиқ тиклана олмайди

"Барселона" ҳимоячиси Жюль Кунде Чемпионлар лигаси ярим финалининг "Интер"га қарши биринчи ўйинида (3:3) жароҳат олди.

COPE нашри маълумотларига кўра, футболчининг оёқ орқа сон мушаклари жароҳатланган — у 6 май куни "Интер"га қарши жавоб ўйини ва 11 май куни Ла Лиганинг "Реал"га қарши учрашувини ўтказиб юбориши мумкин.

Шунингдек, 19 апрель куни "Сельта"га қарши ўйинда сон жароҳати олган Роберт Левандовскининг ҳам Чемпионлар лигасидаги жавоб учрашувида иштирок этиши номаълум. Мушак жароҳатидан тикланаётган Алекс Бальде эса майдонга тушиши кутиляпти.