Канселу Лондон клубига ўтиши мумкин

Ёзги трансферлар ойнасида "Манчестер Сити"дан "Барселона"га ижара асосида ўтган Жоау Канселунинг келажаги ҳамон ноаниқ бўлиб турибди. Уни каталонияликлар қолишини истайди, лекин "Шаҳарликлар" билан музокаралар бўлиб ўтиши керак. 

"The Sun" нашри португалиялик ҳимоячини Премьер-лигага қайтиши мумкинлиги ҳақида хабар берди. Манбанинг таъкидлашича, "Арсенал" футболчига қизиқиш билдирмоқда. Агарда "Барса" ва "Сити" келиша олишмаса, лондонликлар уни қўлга киритиш учун фаол ҳаракат қилади. 

"Канонирлар" анча пайтдан бери Канселуни кузатиб келади. Испания клубидан ҳам олдин "Арсенал" таклиф билан чиқмоқчи бўлган. Аммо бошқа трансферлар сабаб раҳбарият Жоау вариантидан воз кечганди. 

Маълумот учун, 29 ёшли фулбекнинг ижара муддати мавсум сўнггида тугайди. Шартномада сотиб олиш банди йўқ.