Ҳусанов ҳам бор! Европа Чемпионлар лигаси олдидан “Ланс” ҳимоячисини тилга олишди
- 2-сентябр 2023, 18:50
- Zohir Toshxo’jayev
- 0
- Футбол
Европа қитъасининг энг кучли 32 жамоаси клублар ўртасидаги минтақанинг энг нуфузли мусобақаси – Чемпионлар лигаси гуруҳ босқичидаги иштироки орқали бош соврин учун курашга киришади.
Хориж матбуоти ушбу турнирда қатнашадиган собиқ иттифоқ ҳудудидаги мамлакатлардан етишиб чиққан футболчиларни ҳисоблаб чиқди. Унга кўра, бу галги Европа Чемпионлар лигасида бу минтақадаги еттита давлатдан жами 35 нафар чарм тўп устаси қатнашар экан.
Улар ҳақида батафсил тўхталамиз.
Чемпионлар лигасининг гуруҳ баҳсларида Украинанинг “Шахтёр” жамоаси ўйнайди. Шу боис, энг кўп вакил Украинадан бўлади. Умумий ҳисобда, турнирда жами 27 нафар украиналик футболчи мусобақа қайдномасига киритилган. Шулардан 24 нафари “Шахтёр” жамоаси аъзолари экани қайд этилди.
Украиналик легионерлардан ҳимоячи Александр Зинченко Лондоннинг “Арсенал”, дарвозабонлардан Андрей Лунин Мадриднинг “Реал”, Анатолий Трубин Лиссабоннинг “Бенфика” жамоалари шарафини ҳимоя қилади.
Қитъа миқёсидаги турнирда Грузиянинг уч футболчисини кўришимиз мумкин. Италия чемпионлигини қўлга киритган ўтган мавсум кашфиёти Хвича Кварацхелия “Наполи”даги саргузаштларини энг бутун Европа бўйлаб давом эттиради. Унинг ватандошлари – Иракли Азаров ва Георгий Гочолеишвили “Шахтёр”га ёрдам беради.
Кутилмаган номзод Эстониядан. Карл Хейн Лондоннинг “Арсенал” жамоаси захира дарвозабони ҳисобланади. Балки у Чемпионлар лигасида бирор маротаба майдонга тушмас. Лекин 21 ёшли голкипернинг қайдномага киритганининг ўзи ютуқ ҳисобланади.
Санкциялар туфайли Россия минтақавий беллашувларга жамоаларини жўната олмайди. Бутун Россияликлар яқиндаги “Реал Сосьедад”га кўчиб ўтган Арсен Захарян ҳурматидан Испаниянинг ушбу жамоасига ишқибозлик қилишига тўғри келади.
Арманистоннинг энг ёрқин юлдузи Генрих Мхитарян “Интер” сафида ўз тажрибасини ёшларга ўргатмоқда. 35 ёшли ҳужумкор футболчи бу йил ҳам Чемпионлар лигасида юқори натижалар учун курашиши кутиляпти.
Қисқа танаффусдан кейин Ўзбекистон футболчисининг номи яна Европа Чемпионлар лигаси қайдномасидан жой олди.
Кўпчилик ҳали ҳамон Жасурбек Яхшибоевнинг “Шериф” (Молдова) жамоаси сафида Сантьяго Бернабеу стадионида “Реал” дарвозасини ишғол қилганини унутганича йўқ. Бу голдан кейин истеъдодли футболчимизнинг “кўҳна қитъа”даги юлдузли онлари узоқ давом этмади. Ҳозир у “Навбаҳор” сафида Осиё Чепионлар лигасини забт этишга бел боғлаган.
Бу гал Чемпионлар лигасида ўйнаш чеки Абдулқодир Ҳусановга тушган. 19 ёшли футболчимиз Франция вице-чемпиони “Ланс” сафида ҳали расмий дебютини нишонламаган бўлса-да, Европанинг энг нуфузли мусобақасида майдонга тушиши умид қилиб турибмиз.
Абдуқодир Ҳусанов Европа Чемпионлар лигасидаги Марказий Осиёнинг ягона вакили эмас. Тодикистонлик Хусрав Тоиров Донецкнинг “Шахтёр” жамоасига қўшилган. Бу орқали у ҳам ўз юрти футболини Европа майдонида намойиш қилиш имконига эга.