Гвардиола: "Реал"га қарши ўйинда менда ҳеч қандай "қасос" ҳисси йўқ" (матбуот анжумани)

"Манчестер Сити" бош мураббийи Хосеп Гвардиола Чемпионлар лигасининг умумий босқичи 6-турида "Реал"га қарши бўладиган ўйин олдидан фикр билдирди.

Ўтган мавсумда "Мадрид" плей-оффнинг биринчи босқичида "Сити"ни икки ўйинда мағлуб этиб (3:2, 3:1), мусобақадан чиқариб юборган эди. "Қироллик клуби"нинг ҳужумчиси Килиан Мбаппе оёғидаги оғриқ туфайли машғулотларда умумий гуруҳ билан шуғулланмади ва бу сафарда майдонга тушмаслиги мумкин.

– Мбаппенинг йўқлиги сизга тинчлик бахш этадими? Ўтган йилги мағлубият учун “қасос” олиш истаги борми?

– Мен Мбаппесиз ҳам "Реал"га кўп марта қарши ўйнаганман ва улар доим кучли бўлган. Биз ўзимизга эътибор қаратишимиз керак, уларга эмас. "Қасос" деган сўз менга ёқмайди. Мен "Реал"га қарши кўп марта ғалаба ҳам қилганман, мағлуб ҳам бўлганман.

Эртанги ўйин — биз учун яхши синов. Унга пухта тайёргарлик кўрмоқчимиз, чунки бу жуда муҳим ва қўзғатувчи беллашув.

– Мбаппе майдонга тушмаса, катта ўзгариш бўладими?

– Йўқ. Мбаппе албатта ўзига хос футболчи ва унинг бўлиши "Реал" учун катта плюс. Аммо у ўйнамаса ҳам, Винисиус, Родриго каби топ футболчилар бор. Қайси таркиб бўлишидан қатъи назар, биз учун осон бўлмайди. Бу стадионда ўйнаш жуда оғир эканини биламиз.

– "Бернабеу"га келиш учун энг тўғри вақт шу эмасми?

– Бу саволга аниқ жавоб йўқ. Менинг тажрибамда "Реал"га қарши ўйинлар доим қийин бўлган. "Сити"га келганимдан бери уларга беш-олти марта қарши ўйнаганман — ва ҳар доим оғир кечган.

Айниқса Чемпионлар лигасида жамоанинг формаси кўп нарсани ҳал қилмайди. Чунки муҳим ўйинларда улар даражасини янада кўтаришади. "Реал"дан яхши ўйин кутяпман — бу ерда ўйнаш қанчалик мушкуллигини ўз тажрибамдан яхши биламан.

– Бу йилги "Реал" ўтган мавсумдагидан кучлими?

– Ростини айтсам, бу мавсум уларнинг кўп ўйинини кўрмаганман. Фикрим фақат шу ҳафта таҳлил қилган нарсаларимизга асосланади. Улар кўпроқ прессинг қилади, кўпроқ бир-бирга қарши ўйнайди. Эртага шундай бўладими — билмайман.

Бир нарсани аниқ биламан: бу стадионда ўйнаш доим оғир. Эртанги беллашув жуда ҳаяжонли бўлади.

Эслатиб ўтамиз, бўлажак тўқнашув бугун Тошкент вақти билан 01:00’да старт олиши режалаштирилган.