"Финал сари икки қадам қолди" ёхуд Виктор Карпенко ва "Бухоро" қаҳрамонлик кўрсатди
- 28-август 2025, 18:06
- Shuhratbek Jo’rayev
- 0
- Футбол
Ўзбекистон Кубоги чоорак финалида "Бухоро" Тошкентда "Бунёдкор"га қарши учрашувда 2:4 ҳисобида ғалаба қозониб, яррим финал йўлланмасини қўлга киритди. Учрашувдан сўнг "Бухоро"нинг вақтинчалик бош мураббийи Виктор Карпенко матбуот анжуманида ўз фикрлари билан ўртоқлашгани ҳақида клуб матбуот хизмати баён этди.
- Ўйин ҳақида фикрингиз?
- Жуда қувноқ ўйин кўрдик. Олтита гол урилди. Бир сўз билан айтганда, Кубокка хос учрашув бўлди. Ўйин мухлисларга ёқди, деб ўйлайман. “Бунёдкор” ҳам, биз ҳам фақат кейинги босқични кўзлаб майдонга чиққандик. Лекин омад биз томонда бўлди ва ғалаба қозониб ярим финалга чиқдик.
- Умуман бошқа “Бухоро”ни кўрдик. Жамоангиз тинмай ҳужум уюштирди. Бундай иштиёқ қаердан пайдо бўлди?
- Таркибимиз яхши футболчилардан ташкил топган. Мен ўйиндан олдин жамоамиздаги ўйинчиларга Кубокда ғалаба қозониш яхши мотивация беришини ҳамда футболчилик фаолиятда ҳамма ҳам соврин юта олмаслигини таъкидладим. Финал сари икки қадам қолди ва ҳаракат қилсак бемалол ўзимизни кўрсата оламиз. Футболчиларимиз футбол ўйнашни билади, фақат ўзларини ишонтира олишса бас. Вақт ўтиши билан янада кучайиб борамиз. “Бунёдкор”нинг кучли томонларини билардик. Жамоа ёш ва футбол ўйнашни яхши кўради.
- Азизбек Амонов “Бухоро”даги энг яхши ўйинини кўрсатди, деган фикрдамиз. Сиз бу борада нима дея оласиз? Унинг собиқ жамоасига қарши тўп тепиши қўшимча куч бердими?
- Амонов аввалги ўйинда ҳам яхши ҳаракат қилганди. Бугун эса янада яхши ўйин кўрсатди. Амонов бежизга ўз вақтида терма жамоага чақирилмаган. У футбол ўйнашни билади. Унга ҳам ўз кучига бўлган ишонч керак. Шунда янада яхши ҳаракат қила олади. Агар шундай тўп тепишда давом этса, ҳали яна терма жамоага чақирилади.
- Ярим финалда ким билан дуч келишни хоҳлайсиз?
- Биз фарқи йўқ, чунки ярим финалда кучсиз рақиб бўлмайди. Ким тушмасин, ўзимизни кўрсатишга ҳаракат қиламиз. Балки бошқаларнинг “Бухоро”га қарши тушгиси келар. Шундай бўлса ҳам майли. Биз майдонга чиқиб ўзимизнинг футболни намойиш этамиз.