Файзуллаевга четдан қизиқиш бор, фақат...
- 25-июн 2024, 23:04
- Zohir Toshxo’jayev
- 0
- Футбол
Россия Премьер-лигасида Аббосбек Файзуллаев ўйнаётган ЦСКА жамоаси янги мавсумда юқори ўринлар учун курашишга ҳозирлик кўрмоқда.
Клуб раҳбарияти ана шу мақсадда жамоага сербиялик мутахассис Марко Николични бош мураббий қилиб олиб келди. ЦСКА бош директори Роман Бабаев клуб келаси мавсум бошлангунга қадар янги ўйинчилар трансфер қилинишини билдирди.
- Номларни айтишга ҳожат йўқ, лекин куни кеча, қайси позицияларни кучайтириш ва номзодлар ҳақида гаплашдик. Трансферлар бўйича вазият анча мураккаб. Россия трансфер бозори анча қийин, хорижликларни таклиф қилиш ҳам осон эмас. Таркибни кучайтириш кераклигини яхши тушунамиз.
Аввалги трансферлар даврида Аббосбек Файзуллаев, Тимур Мусаев, Данил Круговойни олиб келгандик. Бу гал ҳам янги ўйинчиларни олиб келиш йўлини топишга ҳаракат қиламиз, - деди Роман Бабаев.
ЦСКА бош директори кўпчиликни қизиқтираётган савол – Аббосбек Файзуллаевнинг Европага кетиши ва унга бўлаётган чорловлар масаласига ҳам ойдинлик киритди.
- Ҳақиқатан ҳам, Аббосбек Файзуллаевга қизиқишлар бор, лекин улар ҳаммаси информацион характерга эга. Ҳозирча, аниқ таклифлар йўқ.
Яқин ўртада Файзуллаевнинг кетишини тасдиқлайдиган ҳолат кўзга ташланмаяпти. Аббоснинг ўзи ҳаммаси ўз вақтида бўлишини яхши тушунади, - деди Роман Бабаев.
Таъкидлаш лозимки, Аббосбек Файзуллаев “Пахтакор” тарбияланувчиси ҳисобланади. Ҳужумкор футболчи Тошкент шаҳри клубида 2021-2023 йиллар давомида барча турнирларда 41 та учрашувда майдонга тушиб, ўнта гол ва учта ассист муаллифи бўлган.
ЦСКА истеъдодли ўйинчини ўтган йили августда ўз сафига қўшиб олди. Бу трансфер “Пахтакор”га 500 минг евро келтирди.
20 ёшли Файзуллаев ленионер сифатидаги дебют мавсумида ўз салоҳиятини намойиш қила олди. Аббос Россия Премьер-лигаси ва мамлакат кубоги доирасида жами 32 та учрашувда иштирок этиб, рақиблар дарвозасини беш маротаба ишғол қилди ҳамда жамоадошларига 14 та голли пас узатишни уддалади.
Россияда мавсумнинг асосий кашфиёти сифатида эътироф этилган легионеримизнинг трансфер суммаси бир неча баравар ошиб, айни пайтда 6 миллион еврони ташкил қилмоқда.
Марказий Осиёнинг энг қимматбаҳо ўйинчисига айланган Файзуллаевга Италиянинг “Парма”, Германиянинг “Бавария” ва Испаниянинг “Вильярреал” клубларидан қизиқиш бўлаётгани ҳақида хабарлар тарқатилган эди.
Аббосбек Файзуллаев якунланган мавсумда халқаро миқёсида ҳам муваффақиятли фаолият кўрсатди. У 23 ёшгача бўлган футболчилардан таркиб топган терма жамоамизнинг илк бор ёзги Олимпия ўйинларига йўлланма олишига ёрдам берди. Ўзбекистон U-23 терма жамоаси сафида 14 та учрашувда учта тўп киритди ва учта ассист қайд этди.
Ўтган ёз Ўзбекистон миллий терма жамоасига қабул қилинган Файзуллаев Сречко Катанец қўл остида ҳозирча 17 та баҳсда майдонга тушиб, ўз ҳисобига тўртта гол ҳамда битта голли пас ёздириб қўйди.