Файзуллаев бир поғона кўтарилди
- 22-май 2024, 18:00
- Zohir Toshxo’jayev
- 0
- Футбол
Россиянинг “Спорт Экпресс” нашри 30 йилдан ортиқ вақт мобайнида футбол бўйича мамлакат чемпионатининг ҳар бир турида футболчилар ҳаракатини баҳолаб, рамзий терма жамоа тузиб чиқади.
29-тур якунлари бўйича тузилган рейтингда ЦСКАдаги ҳамюртимиз Аббосбек Файзуллаев рамзий терма жамоадан ўрин олди ва умумий рейтингда бир поғона кўтарилди.
Файзуллаев мазкур турда рамзий терма жамоага энг кўп – етти маротаба киритилган футболчига айланди. ЦСКА ушбу турда “Нижний Новгород” майдонидан 6:2 ҳисобидаги ғалаба билан қайтган эди. 20 ёшли легионеримизнинг бу баҳсдаги ҳаракатлари экспертлар томонидан 7,5 баллга лойиқ кўрилди.
Рамзий терма жамоа қуйидагича кўриниш олди:
Шунингдек, умумий рейтингда жиддий ўзгаришлар бўлди. Бу турда бешта гол урган “Зенит” ҳужумчиси Матео Кессьерранинг ўйини жуда юқори – 9,5 баллга лойиқ кўрилди. Бунинг самарасида легионер футболчи рейтингда бешинчи ўриндан биринчи поғонага кўтарилди.
Умумий рейтингда кучли ўнликка кирган футболчилар билан танишинг.
1. Матео Кассьерра (“Зенит”) — 6,39 ( чемпионат давомидаги ўртача балл)
Колумбиялик форвард беш ўйиндан иборат голсиз сериясига бешта гол билан якун ясади.
2. Максим Глушенков (“Локомотив”) — 6,36
“Факел”га қарши баҳсда энг кўп хавфли вазият яратиб берди.
3. Константин Тюкавин (“Динамо”) — 6,33
“Крилья Советов” билан баҳсда ҳимоячилар эътиборини ўзига тортиб турди.
4. Эдуард Сперцян (“Краснодар”) — 6,32
“Сочи” дарвозасига энг кўп зарба берган, жамоадошларига энг кўп ўткир пас узатган футболчи бўлди.
5. Вендел (“Зенит”) — 6,27
Кассьерранинг бешта голидан иккитасига айнан Вендел ассистентлик қилди.
6. Жон Кордоба (“Краснодар”) — 6,27
“Сочи” билан баҳсда голли паси билан ғалабага ҳисса қўшди ва жамоасини чемпионлик курашида олиб қолди.
7. Аббосбек Файзуллаев (ЦСКА) — 6,25
“Нижний Новгород”га қарши голлар шоусида иккита ассистни амалга оширди ва майдонда энг фаоллардан бири бўлди.
8. Дуглас Сантос (“Зенит”) — 6,21
Грознийдаги баҳсда ўнг қанот ҳимоячиси вазифасини бажарди ва жароҳат олди.
9. Клаудиньо (“Зенит”) — 6,19
Фаол ўйнади ва битта ассист қайд этди.
10. Бителло («Динамо») — 6,16
“Крилья Советов” дарвозасини ишғол қилди.
Россия Премьер-лигасининг сўнгги — 30-тур учрашувлари 25 май куни бир пайтда — Тошкент вақти билан 18:30 да бошланади.