Фарерлик футболчилар шов-шув кўтарди

2026 йилги жаҳон чемпионати Европа минтақаси саралаш турнирида Фарер ороллари миллий терма жамоаси қайд этаётган натижалар ҳамма ҳайратга сола бошлади.

Бу терма жамоа саралаш гуруҳининг саккизинчи турида Чехия футболчилари билан куч синашиб, муҳим учрашувда 2:1 ҳисобида зафар қучди.

Баҳснинг 67-дақиқасида мезбонлар вакили Ханус Сёренсен ҳисобни очган бўлса, чехияликлар Адам Карабецнинг аниқ зарбаси эвазига 78-дақиқада вазиятни тенглаштирди. Лекин меҳмонларнинг хурсандчилиги узоқ чўзилмади.

Ҳисоб тенглашганидан уч дақиқа ўтиб, Фарер ороллари терма жамоаси ҳимоячиси Мартин Агнассон ғалаба тўпини киритди.

 Фарерликлар шу тариқа ўз тарихида илк бор кетма-кет учта ўйинни ғалаба билан якунлади. Аввалги турларда бош мураббий Эйдун Клакстейн шогирдлари Черногорияни 4:0 ва Гибралтарни 1:0 ҳисобида енгган эди.

Айни пайтда Фарер ороллари терма жамоаси 2026 йилги жаҳон чемпионатининг минтақавий саралаш турнирида L гуруҳида 12 очко билан учинчи ўринда бормоқда.