Европадаги легионеримиз фаолияти ҳали бошланмай тугадими?
- 25-март, 07:50
- Zohir Toshxo’jayev
- 0
- Футбол
Наманганлик тажрибали футболчи Абдуғани Камолов январь ойида Косовога йўл олиб, ушбу мамлакатнинг “Феризай” клуби билан ярим йиллик шартнома имзолаган эди.
Шу тариқа, Камолов Косово чемпионатида тўп тепган биринчи ўзбек футболчиси бўлиш имконияга эга бўлганди. Мана орадан уч ой ўтса ҳамки, 26 ёшли легионеримиз Европа мамлакати лигасида дебютини нишонлагани йўқ.
Eurasia Football нашри ушбу вазиятга ойдинлик киритди.
Манбанинг қайд этишича, Футболчининг агенти Амиль Шукало мижози Абдуғани Камолов “Феризай” билан январь ойидаёқ шартнома имзолаган ва расман рўйхатдан ўтганини бироқ жамоага қўшила олмаганини маълум қилган.
Сабаби — виза жараёни чўзилиб кетган. Ўзбекистон фуқаролари Косовода ишлаш учун рухсатнома олиши керак ва бу жараён кутилганидан кўра кўпроқ вақт олган.
Шукалонинг сўзларига кўра, шартномани ўзаро келишув асосида бекор қилиш варианти ҳам кўриб чиқилган, аммо аксарият мамлакатларда трансфер ойнаси ёпилгани сабабли бу иш ҳам амалга оширилмади.
- Ўзбекистон фуқаролари Косовода ишлаш учун рухсатнома олиш мақсадида виза жараёнидан ўтиши керак ва маъмурий сабаблар туфайли бу жараён кутилганидан ҳам кўпроқ чўзилди. Шунинг учун футболчи жамоага қўшила олмади, - дейилади маълумотда.
Камоловнинг “Феризай” билан шартномаси 2026 йилнинг ёзигача мўлжалланган. У тугагач, футболчи фаолиятини давом эттириш учун янги вариантларни кўриб чиқиши мумкин.
Абдуғани Камолов Наманганда туғилган бўлса-да, “Бунёдкор” тарбияланувчиси ҳисобланади.
Чап қанот ўйинчиси сифатида шаклланган Камолов 2020-2025 йиллар давомида Ўзбекистонда фаолият юритиб, “Металлург Бекобод”, “Андижон”, “Турон”, “Шўртан” ва “Навбаҳор” жамоаларида тўп сурган.
2025 йилда Абдуғани Қирғизистон чемпионатига кўчиб ўтди: аввал “Абдиш-Ота” жамоасида ўйнади, кейин “Бишкек Сити”да тўп тепди. Ҳар икки жамоада ҳам асосий ўйинчилардан бири бўлган. “Абдиш-Ота” жамоаси таркибида Қирғизистон Суперкубоги соҳиби бўлган.
Вазият тақозоси билан Абдуғани Камолов ёзда яна ўзига янги жамоа топиши талаб этилади.