Европа Лигаси даражасининг кўтарилганию, жамоаларнинг ички чемпионатдаги натижалари ҳақида финалгача роса баҳс юритдик. Энди улар бирмунча узоқроқ ўтмишга доҳил. Бугун ушбу жамоалардан бири мавсумни титул билан якунлаш шарафига муваффақ бўлади. Ҳар иккисида янги мураббий мавсум аввалидан иш бошлаган. Ушбу давр мобайнида миланликлар ҳам, андалусияликлар ҳам анча ўзгаришга эришди. Иккиси ҳам номлар билан бойиди. Ўзига хос кашфиётлар пайдо бўлди. Қисқаси, бугун уларнинг ўйинига қарар эканмиз, мураббий имзосини аниқ ҳис қиламиз. Мураббийларнинг номи топ жамоалар орқали қулоғимизга ўрнашган. Беихтиёр, сўнгги йилларда ўз даражасини йўқотиб қўйган бу икки клуб ҳам энди Европанинг гранд клублари қаторида тургандек туюлмоқда. Контенинг “неррадзурилар” раҳбарияти билан келишмовчилиги ҳақидаги гаплар ортда қолган, деб умид қилган ҳолда айтишимиз мумкинки, келгуси мавсум жамоа чемпионлик учун жиддий курашади. “Севилья” чемпионлик учун курашиши бироз қийин масала. “Реал”, “Барселона” ва “Атлетико” билан тенгма-тенг рақобат олиб бориш учун андалусияликлар бир неча йиллик тизим шакллантиришлари ва таркибидаги истеъдодларни сақлай билишлари зарур.
Бугун ҳар икки жамоа таркибида бир-бирига рақиблик қилиши кутилган шахслар етарли. Аввало, мураббийларнинг катта ўйини олдида турибмиз. Иккиси ҳам анча тажрибали ва ўз услубига эга ҳисобланади. Бугунги ўйин уларнинг қарорларига қараб ўз сценарийсини белгилаб олади. Бундан ташқари, Окампос - Лукаку, Банега - Эриксен, Регилон - Бастони дуэллари мухлислар эътиборини тортиши аниқ.
“Севилья”
Испанлар финалгача бўлган йўлни анча қийин рақибларга қарши ўтказишди. “А” гуруҳи ғолиблари 1/16 финалда кутилмаганда “Клуй”ни аранг мағлуб этишди. Икки учрашув натижаси тенг келиб қолгач, “Севилья” меҳмондаги голлар эвазига кейинги босқичга йўл олди. Нимчорак финалдан бошлаб, андалусияликлар грандларга қарши ўйнашга маҳкум этилди. Нимчорак финалда “Рома”га ҳеч қандай имкон қолдирмаган Лопетеги шогирдлари чорак финалда Англиянинг энг ёқимтой жамоаларидан ҳисобланган “Вулверхэмптон”ни учрашув якуни арафасида Лукас Окампос томонидан киритилган ягона гол эвазига мағлуб этди. Ярим финалда эса “Манчестер Юнайтед”га қарши ўйин ҳақиқий драмага айланиб кетди.
Бир тарафдан, бу уларга анча ёрдам бериши мумкин. Чунки улар ҳар хил услубдаги катта жамоалар билан ўйнаб, яхшигина амалиёт ҳосил қилиб олди.
5 карра ушбу кубокни боши узра баланд кўтарган испанларда турнир тажрибаси юқори. Бироқ юқорида таъкидлаб ўтганимиздек, у пайтлар тарихда қолган.
Тахминий таркиб: Буну, Навас, Кунде, Диего Карлос, Регилон, Банега, Фернандо, Жордан, Сусо, Эн-Несири, Окампос.
Сўроқ остида: Окампос.
“Интер”
Чемпионлар Лигасида ўлим гуруҳидан жой олган миланликлар омадсиз иштирок сабаб Европа Лигасига равона бўлганди. Бу турнирдаги ўйинлар эса уларга анча омадли келди. Плей-оффнинг дастлабки босиқичида “Лудогорец” 4-1 ҳисобида таслим этилди. Юқорида биз “Севилья”нинг йўлини қийин эканлигини айтиб ўтдик. Ҳа, уларнинг рақиблари номдорроқ. Аммо “неррадзурилар” ҳам бир қатор қийин учрашувларни ўтказишди. “Интер” аксарият жамоалардан фарқли равишда нимчорак финални ҳам битта ўйиндан иборат ҳолда ўтказди. Ушбу мавсум кашфиётларидан бири ҳисобланган “Хетафе” Конте шогирдларининг класс устунлиги қурбони бўлди. Чорак финалда Хаверци бор “Байер” ҳам грандларга хос хотиржамлик билан енгилди. Ярим финалда бирмунча енгилроқ рақибга тўқнаш келгани боис бизда юқоридаги фараз юзага келган бўлиши мумкин.
Умуман Конте АПЛнинг собиқ ветеранларидан яхши жамоа туза олди. Ушбу мавсум учун бу танловлар қисман ўзини оқлагандек. Бироқ келажак ҳам керак бўлса “Жузеппе Меацца” эгалари таркибда ёшартириш ишларини олиб боришлари зарур.
Нима бўлган тақдирда ҳам, бугун “Интер” кучли жамоа ва тунда бўлиб ўтадиган финал баҳсида улардан чиройли ўйин кутишга ҳақлимиз.
Тахминий таркиб: Ханданович, Годин, Де Врей, Бастони, Дамброзио, Барелла, Брозович, Гальярдини, Янг, Мартинес, Лукаку.
Иштирок эта олмайди: Весино.
Сўроқ остида: Санчес.
Мураббийлар
Хулен Лопетеги: “Интер” Чемпионлар Лигасига хос жамоа. Уларда ушбу классга тортадиган бир нечта футболчилар бор. Уни устига, мураббий ҳам катта тажрибага эга. Бу биздан рақибга қўшимча ҳурматда бўлиш ва ушбу синовга жиддий тайёрланишни талаб қилади. Жуда катта синов олдида турибмиз.
Антонио Конте: “Биз иштиёқ ва ғалаба соғинчи билан ўйнашимиз зарур. Кубокни Италияга, “Интер”га қайтариш пайти келди. Биз кучлироқ эканимизни исботлашга мажбурмиз. Ҳар бир ўйиндан сўнг хатоларни тан олиш муҳим. Шундай экан, ғалаба қозонсак, кубокни уйимизга олиб кетамиз. Мағлубиятга учрасак, рақибни олқишлаймиз.
Хулоса ўрнида
Бугун Европа футболининг энг катта номлари Германияга жам бўлишади. Хусусан, Александр Чеферин бошлиқ масъул делегация чемпионларни шахсан тақдирлаш учун етиб келган. Мукофот жамғармаси 8,5 млн еврога тенг кубокни иккала жамоа ҳам қўлга киритишни исташи табиий. Финал омадсизи ҳам 4,5 млн еврога эга чиқади. Уларнинг шу босқичга етиб келгунча тўплаган маблағлари бундан мустасно.
Ном жиҳатидан “Интер” фаворит, дея эътироф этилмоқда. Шахсан ушбу фикрга қўшиламан. Конте жамоа раҳбарларига ниманидир исботлаш учун ҳам бирорта титул қўлга киритиши керак. “Севилья” эса осонликча бўйин эгмайди. Уларга барча ерда янграётган, бу - “Севилья”нинг турнири, қабилидаги гаплар мотивация бериши мумкин. Аммо ўзларида салоҳият бўлмаса, минг гапирилгани билан фойдаси йўқ. Андалусияликларда эса ғолибликни қўлга киритиш учун етарлича куч ва имкониятлар мавжуд. Аниқки, ушбу учрашув тақдирини оний қарорлар ҳал қилади. Иккала жамоада ҳам бирдек имкониятлар бўлади, ким аниқроқ ҳаракат қилса, ғалаба ўшаники.
Абдулвосид Валихонов тайёрлади