Элдор Шомуродов ва Одил Аҳмедов “махсус” термадан жой олди!
- 25-апрел 2021, 05:55
- Zohir Toshxo’jayev
- 0
- Футбол
Ҳар бир юртнинг машҳур футболчилари бор. Улар ўзларининг миллий терма жамоасини ғалабаларга етаклаш орқали мухлислар қалбидан муқим жой олади. Яқинда мутахассислар Россия ва Украинадан ташқари Мустақил Давлатлар Ҳамдўстлиги ҳудудидан етишиб чиққан футболчилардан таркиб топган рамзий терма жамоани тузиб чиқди.
“Махсус” термадан қуйидаги футболчилар жой олди.
Дарвозабон: Гедрюс Арлаускис
Литвалик дарвозабон Гедрюс Арлаускис “Рубин” таркибида Россия кубоги ва Суперкубогини қўлга киритган. “Унирей” ва ЧФР клубларида жами уч бор Руминия чемпиони бўлган. Фаолияти давомида “Уотфорд” ва “Эспаньол” каби машҳур жамоалар дарвозасини ҳам қўриқлаган.
Чап қанот ҳимоячиси: Дмитрий Шомко
Ҳам ҳимоячи, ҳам ярим ҳимоячи вазифасини маҳорат билан уддалай олган Дмитрий Шомко “Астана”нинг ишонган тоғи эди. У жамоаси билан олти карра Қозоғистон чемпиони бўлди. 2021 йилдан Россия премьер-лигасида “Ротор” шарафини ҳимоя қилмоқда.
Марказий ҳимоячи: Александр Мартинович
Беларуслик футболчи ҳимоянинг ҳақиқий “девори”. 33 ёшли футболчи 2010 йилдаёқ Минскдан “Краснодар”га келганди. Бу жамоа таркибида 200 дан зиёд учрашув ўтказиб, уч марта чемпионат бронза медалига ҳам сазовор бўлди. Европа Чемпионлар лигаси ҳавосини олган ўйинчилардан биридир. Беларусь терма жамоасида 75 та учрашув ўтказди.
Марказий ҳимоячи: Соломон Квирквелия
Грузиялик футболчи “Рубин” таркибида Россия кубогида зафар қучган. Кейинчалик “Локомотив”га ўтиб, “тўмирйўлчилар” ҳимоясини мустаҳкамлади. 29 ёшли футболчининг ўйинида пасайиш кузатилаётгани боис, у “Ротор”га жўнатилди. Терма жамоага ҳам чақирмай қўйишди.
Ўнг қанот ҳимоячиси: Рагнар Клаван
Рагнар эстониялик футболчилар орасида энг машҳури. Бу ҳимоячи АЗ таркибида Нидерландия чемпиони бўлган. Бундеслигада “Аугсбург” шарафини муносиб ҳимоя қилган. “Ливерпуль”да ўйнаб юрган кезлари Англия премьер-лигасида гол урган ва клуби билан Чемпиондар лигасининг финалига чиққан. Ҳозир А Серияда “Кальяри”да тўп тепмоқда.
Таянч ярим ҳимоячиси: Одил Аҳмедов
Ўзбекистон миллий терма жамоаси сардори Россия премьер-лигасида беш йил фаолият кўрсатди. “Анжи” ва “Краснодар” жамоаларининг совриндорлар қаторидан жой олишига муносиб ҳисса қўшди. Жаҳон юлдузлари билан Хитой чемпионатида ҳам қатнашди ва “Шанхай СИПГ” клубида чемпион бўлди.
Маълум муддат эркин агент мақомида юрган Одил Аҳмедов яқинда Хитойдаги учинчи клуби билан расман шартнома тузди.
Ярим ҳимоячи: Артур Ионицэ
Молдовалик футболчи айни пайтда “Беневенто”нинг А Серияда қолиши учун курашмоқда. 30 ёшли футболчи бунгача “Верона” ва”Кальяри” жамоаларида 200 дан зиёд учрашувларда қатнашиб, катта тажриба тўплаган. “Беневенто”да 31 та ўйинда бир жуфт гол уришга эришди.
Ярим ҳимоячи: Генрих Мхитарян
Арманистонлик футболчи МДҲ ҳудудидан етишиб чиққан энг қимматбаҳо футболчидир. Ўз вақтида “Шахтёр”, “Боруссия”, “Манчестер Юнайтед” ва “Арсенал”да порлаган Генрих ҳозир “Рома” етакчиларидан. Мхитарян жорий мавсумда А Серияда 9 та гол уриб, саккизта голли пас оширди. Европа лигасида эса, биттадан гол ва голли узатма муаллифи бўлди.
Ярим ҳимоячи: Хвича Кварацхелия
20 ёшли грузиялик футболчи “Рубин” етакчисига айланди. Техникаси ўта кучли бўлган Хвичани Европа клублари ўз сафида кўрмоқчи. Кварацхелиянинг Испания терма жамоаси дарвозасини ишғол қилганидан кейин харидорлари кўпайиб кетганини таъкидлаш лозим.
Ҳужумчи: Саркис Адамян
Арманистонлик футболчи ўтган мавсумда “Хоффенхайм”нинг етакчиларидан бири бўлди. Унинг Бундеслигадаги бешта голи жамоасининг Европа Лиаҳгасига қайтишига ёрдам берди. Адамян жорий мавсумда асосий таркибда кам кўриняпти. 27 ёшли ҳужумчи Бундеслигада битта, Европа Лигасида иккита тўп киритди.
Ҳужумчи: Элдор Шомуродов
Аслида МДҲ ҳудудида юқори савияли ҳужумчилар жуда кам. Шунга қарамай, ушбу рамзий терма жамоадан Шомуродов ҳақли равишда жой олди. “Ростов”да порлаган ҳамюртимиз “Женоа”га ўтгач, ўз салоҳиятини намойиш қила олди. Италияда ўнта голли вазиятда бевосита иштирок этди. Шомуродовнинг ўзи тўртта гол урди. Ҳар ҳолда “Ювентус” сингари Италия чемпиони нишонига тушгани ҳам бежиз эмас, албатта.
