Бутун мавсумни сўнгги ўринларда ўтказган жамоа Ла Лигани тарк этишдан норози

"Эспаньол" клуби Ла Лига раҳбариятидан қуйи лигага тушириб юбормасликни ва коронавирус пандемиясидан кейинги рестарт ўйинларини бекор қилишни сўраб, баёнот билан чиқди.

"Рестартдан кейинги яратилган барча шароитларни, бир нечта клубнинг адолатсизлик ва муҳим қарорларнинг етишмаслигидан норози бўлганлигини, сўнгги кунларда рўй берган воқеаларни инобатга олган ҳолда, "Эспаньол" жамоаси Ла Лига томонидан ташкиллаштирилган барча баҳсларни бекор қилиш тарафдори.

Стадионларда мухлисларнинг етишмаслиги барча жамоалар учун катта муаммо эди, аммо бизнинг вазиятимизда бу ҳолат янада сезиларли бўлди. Сабаби, Ла Лигада жон сақлаб қолиш учун ўта муҳим бўлган 5 та учрашувда майдонга тушдик.

Март ва апрель ойларида коронавирусга чалинган футболчилари кўп бўлишига қарамай, "Валенсия" ёки биз каби жамоалар одатдагидек ўйнашга интилдик, аммо бу бир неча ҳафта ичида натижаларга ўз таъсирини кўрсатмай қолмади," - дейилди баёнотда.

Бундан ташқари, "Эспаньол" лига раҳбариятини Сегундадаги вазиятга қаратди, бу ерда коронавирус пандемияси туфайли, лигани тарк этишга яқин турган "Депортиво" ва плэй-офф йўлланмаси учун курашаётган "Фуэнлабрада" жамоаларининг ўртасидаги баҳс қолдирилган ва бу қолган жамоаларнинг эътирозлари ва норозиликларига сабаб бўлган. Чунки, сўнгги турнинг барча ўйинлари бир вақтда бўлиб ўтиши керак эди.

Таъкидлаш жоизки, "Эспаньол" мавсум тўхтаган пайтда 20-ўринда эди ва рестартдан кейин ҳам сўнгги поғонада қолиб кетди. Бундан ташқари, жамоа бутун мавсум давомида фақат биттагина турдан сўнг, хавфли зонадан юқорига кўтарила олган ҳолос! Жамоа 15-турдан буён, охирги поғонадан жой олиб келди.