Бу мавсумдаги МЮ зўр эмас. Шунчаки, "Ливерпуль", "Тоттенхэм" ва "Челси" ёмонроқ эди!

АПЛ 28-туридан ўрин олган қолдирилган беллашувда "Брайтон" ўз майдонида МЮни қабул қилди. Ўйиннинг биринчи таймида "Юнайтед" рақибга нисбатан ҳужумкорроқ ўйин кўрсатди ва хавфли вазиятлар яратди. Бироқ умумий картинада барибир тенглик гувоҳи бўлдик.

Баҳснинг сўнгги декадасида, аниқроғи, 80-дақиқалардан сўнг мезбонларни тўхтатиб бўлмади. Захирадан майдонга тушган Марч, япониялик чаққон Митома ҳамда аллақачон катта футболчига айланиб улгурган Макалистер триоси сўнгги дақиқаларда МЮ мудофааси атрофида анча шовқин кўтарди ва бунинг натижаси ўлароқ пенальти ишлашга муваффақ бўлди. Алексис 11 метрлик жарима зарбасини аниқ амалга оширди ва "Брайтон" МЮ устидан ғалаба қозонди.

Номлар жиҳатдан МЮ устун, 3 очко ҳам айнан уларга кўпроқ керак эди. Сабаби, 3-ўрин учун ҳамда 4-ўринни мустаҳкамлаш учун курашяпти манкуниаликлар. Бу вазиятда қайси жамоа кўпроқ ҳужумкорлик намойиш этиши керак эди? Албатта, МЮ.

Тен хаг жамоаси дурангни ушлашга ҳаракат қилдими ёки "Брайтон" чиндан ҳам ҳужумга ўтишга қўймадими? Билмадим. Аммо ҳар икки ҳолатда ҳам айбдор тен Хаг. Мавсум аввали ва охиридан келиб чиқиб хулоса қилсак, нидерландиялик мутахассис ҳамон аниқ бир услубга эга кучли жамоа ярата олмаганига гувоҳ бўламиз.

"Севилья" - МЮ баҳсида "қизил иблислар" 62 фоиз тўп устунлигига эга бўлди ва якунда йирик 0:3 ҳисобида мағлуб бўлди. "Брайтон"га қарши бўлиб ўтган ўйинда эса "чайкалар" тўп назоратида устун эди ва 1:0 ҳисобида тен Хаг шогирдларидан устун келди. Ҳужумкор футбол намойиш этаётган жамоа ҳам, қарши ҳужумларга таяниб ўйнаётган жамоа ҳам "Юнайтед"дан устун келяпти. Хоҳлаганича ўйнаб ютишяпти, дегани бу. Тўғри, таркибдаги йўқотишларнинг қиймати юқори. Аммо биз ҳозир МЮнинг "Севилья" ва "Брайтон"га қарши ўйинларига тўхталиб ўтдик. Шу йўқотишлар билан ҳам "қизил иблислар" бу типдаги жамоаларни ютиши лозим эди.

Агар мавсум якунига қадар "Ливерпуль" АПЛ турнир жадвалида "Юнайтед"ни қувиб ўтса, ҳайрон қолмайман. МЮда 5 та, мерсисайдликларда эса 4 та ўйин ва 4 очколик фарқ. Бу сезиларли, аммо темп нуқтаи назаридан олсак, Клопп шогирдлари сўнгги беллашувларда ҳақиқий топ клуб статусига мос ўйин кўрсатяпти. МЮ эса адашиб кучли тўртликда юрган ва охир-оқибат барибир Европа лигасида қатнашадиган айрим "ёқимтой" жамоалар каби ҳаракат қилмоқда. Уларни худди 3-4 йил аввалги "Лестер"га ўхшатяпман.

"Реал" ЕЧЛнинг гуруҳ босқич ўйинларида очко йўқотиши, мағлуб бўлиши ва гуруҳдан иккинчи ўрин билан чиқиши мумкин. Аммо плей-оффда жамоа асл кучини кўрсатади. "Сити" мавсум давомида АПЛда кўп қоқилиши мумкин. Шундай бўлса-да, охирги турларда мана неча мавсумдирки салкам максимал очколарни қўлга киритиб келмоқда. "Боруссия"нинг "югургани" ҳам "Бавария" билан ўйингача! Ҳар мавсум улар қайсидир паллаларда мюнхенликлардан ўзиб кетади ва охир-оқибат барибир қайси жамоа чемпион бўлишини ўзингиз биласиз.

Агар бу мавсум МЮ ЕЧЛ йўлланмасига эга чиқса, бу улардаги прогресс, демаган бўлардим. Шунчаки, "Ливерпуль" стабил бўлмаган мавсум ўтказди. Шунингдек, "Тоттенхэм" ва "Челси"да кичик инқироз рўй берди. Тен Хаг жамоаси мавсумнинг қайсидир қисмида фурорт кўтарди. Бу ҳолат муддатли эйфория эди. Охирги учрашувлар бу фикримнинг исботи бўла олади. Қилинадиган ишлар ҳали кўп. Кимларнидир сотиш ва яна кимларнидир олиш керак. Яна бир мавсум натижалар қониқарли бўлмаса, мураббий ўзгаради. Узоқ вақтдан буён давом этаётган абсурд жараён. 



"Қизил иблислар" жуда кўп трансферларга қўл уради ва мураббийлар тинимсиз алмашади. Янги келган мутахассисга ўз услубига мос футболчи керак бўлади ва айрим эски юлдузларнинг жамоага кераги бўлмай қолади. Келишмовчиликлар вужудга келади, ички муҳит бузилади. Бу каби такрорий ҳолатлар натижаларда ҳам такрор ва такрор ўз аксини топади. Муваффақиятсизликнинг ажойиб механизми. Муваффақият механизми яратилиши ва ишлаши учун сабр даркор. Олдин англа, кейин танла!
 



                                                                                                                                          Худайқулов Карим мақоласи