"Биз ваъда берганмиз, Суперлигага чиқишимиз керак" - "Нурафшон"ни қўлга олган мураббий қўрқмаяпти, унинг шашти баланд

Олдин хабар берганимиздек, “Нурафшон” клубида Усмон Тошевнинг ўрнини маҳаллий мураббий Мирислом Ҳасанов эгаллади.

Энди у бухороликларга бош мураббийлик қилади. У бу лавозимда биринчи бор ишламаяпти. Яқинда ҳам Ҳасанов “Нурафшон”нинг бир нечта учрашувларида вақтинча бош мураббийлик қилганини яхши биламиз. Ўшанда натижалар чакки бўлмаган.

Хуллас, бухороликлар мавсумни Мирислом Ҳасанов билан тугатиб қўядиган бўлдилар. Жамоа Суперлигадан ҳали умид узгани йўқ. Вақтинча бош мураббий этиб тайинланган Ҳасанов “Нурафшон”ни элитага олиб чиқмоқчи. Бу ҳақда у Sports.uz мухбири билан суҳбатда айтиб ўтди.

- Футболчилар профессионал. Бугун улар билан гаплашиб олдик, - дея гап бошлади Ҳасанов. - Ҳозирги мақсадимиз учинчи ўринни эгаллаб плей-оффда қатнашиш. Биз Суперлигага чиқамиз деб ваъда берганмиз. Буни бажаришимиз керак. Шундай вазиятлар бўлдики, жамоанинг ўйини чиқмади, мураббийлар алмаштирилди. Буни ўйинчиларга ҳам таъсири бўлади. Кеча Усмон ака Тошев йиғилиш ўтказиб, мени жамоани бошқаришимни айтди. Бугун машғулот ўтказдик. Энди йўлга чиқамиз ва эртага “Олимпик”ка қарши ўйин олдидан яна машғулот ўтказамиз. Бу жамоа учинчи ўрин учун курашда бизнинг асосий рақобатчимиз. Охиригача ҳаракат қиламиз. Ўйинчиларимизга ишонамиз.

- Муваффақиятсиз ўйинлардан сўнг, футболчиларнинг кайфияти ва жамоадаги муҳит қандай?

- Муҳит қандай? Исталган мағлубиятдан кейин муҳит яхши бўлмайди. Лекин биз барчасини яхшилашга ҳаракат қиламиз. Ҳозир “Олимпик” билан учрашувга бор эътиборни қаратганмиз, ютиб олсак, кейин чемпионатда танаффус бўлади. Ўша пайтда 25 кун вақтга эга бўламиз. Аммо бир-иккита машғулот билан ҳам муҳитни яхшилашга уриняпмиз.

- Нима деб ўйлайсиз, “Нурафшон”нинг тўғридан-тўғри Суперлигага чиқиш имконияти қолмадими?

- “Нефтчи” чиқиб бўлди ва “Динамо” ҳам 90 фоиз Суперлигада. Тўртта ўйинимиз қолган. Максимал курашамиз. Ўйинлар ҳам осон эмас. Масалан, “Динамо” яхши ўйин кўрсатяпти. Уларда имконият яхшироқ, бизга қараганда. Биз эса “Олимпик” билан учинчи ўринга курашамиз. Бўлажак рақибимиз ҳам яхши жамоа.

- Мавсум аввалида “Нефтчи” билан “Нурафшон”нинг Суперлигага чиқиши тахмин қилинганди. Аммо бухороликлар ўрнига “Динамо” бу ишни уддалаяпти. Сиз “Нурафшон”да кўп йиллардан бери ишлаяпсиз ва ҳаммасини ичидан биласиз. Клубда қайси тизим нотўғри йўлга қўйилган?

- Асосий мақсад Суперлигага чиқиш эди. Бошида Даврон ака Файзиевга ишонч билдирилдими, имконият бериш керак эди. Мана, Ҳаким Фузайлов “Динамо”га келди. Улар ҳам очколар йўқотди, аммо раҳбарият мураббийга имконият беришда давом этди. Ҳар бир мураббийга ишониш керак-да. Қолаверса, бизни ўз стадионимиз йўқ. Икки йилдан бери майдонимиз йўқлигидан азоб чекяпмиз.

- Шуни ҳам сўрамоқчи эдим. Нима сабабдан марказий стадион ҳалигача фойдаланишга топширилмаяпти?

- Майдонни тайёрлашганди, аммо иссиқ ҳавода, қуёшда майса куйиб кетди. Энди бошқа мутахассислар келган ва бошқатдан тайёрлашяпти. Аслида бу йил иккинчи даврадан ўз майдонимизда ўйнашимиз керак эди. Яна шуни ҳам айтмоқчиман, қийин вазиятларда жамоани менга берадилар. Шу клубда ишлар эканман, ҳар доим ёрдам беришга тайёрман.

- Бунгача ҳам жорий мавсум аввалида маълум вақт жамоани бошқардингиз ва натижалар чакки бўлмаганди. Ўшанда раҳбарият яна ишонч билдиришларини сўрамаганмисиз?

- Бу ерга Усмон Тошев келиши керак эди. Чунки раҳбарият бу мураббий билан гаплашиб қўйганди. Анвар Бердиев бош мураббий бўлиб ишлаётганди ва жамоа самарқандликларга ютқазганидан кейин Усмон Тошев менга алоқага чиқиб, клубни бошқариб туришимни айтиб ишонч билдирган. Кейин ўзи келиб, ишни давом эттирди.

- Тошевнинг кетиб қолишини жамоа қандай қабул қилди? У тўғри қилдими ёки нотўғрими?

- У бизнинг устозимиз. Бу саволга бирор нима деб жавоб бера олмайман. “Нефтчи” билан ўйинга бир кун қолганида Усмон ака мени Тошкентга чақиришяпти, кетишим керак деди. Биз ўша ўйин куни Тошевнинг ЎФАда иш бошлаганини эшитдик. Биз ҳам ҳайрон бўлиб қолдик.

- Мураббийлар штабида кимлар ёрдам беради?

- Ҳозирча Суҳроб Қобилов бор ва тожикистонлик мураббийлар ҳам ҳали жамоада. Усмон Тошев келганида уларни ўзи билан олиб келганди.

- Вазиятга реал қараганда, “Нурафшон”ни Суперлигага қайтаришга неча фоизга ишоняпсиз?

- Тўғрисини айтаман, агар учинчи ўринни олсак, кейин битта ўйин қолади ва биз боримизни берамиз. Бу учрашув ўз майдонимизда ўтади. Плей-оффда ким билан ўйнасак ҳам Суперлиганинг бирор клубидан қўрқадиган жойимиз йўқ. Плей-оффда ютиб Суперлигага чиқишимизга ишонаман. Ваъда берганмиз.

- Тожикистонлик ҳужумчи Тоҳир Маладустов жамоадами? Нега у ўзини кўрсата олмаяпти?

- У шу ерда. Бу футболчида ўйин амалиёти етарли даражада эмас. Самарқандликлар билан ўйинда унга имконият бердик. Аммо у ҳали чемпионатимизда ўйнашга тайёр эмас. Про-лига бўлса ҳам бизда яхши савия бор. Лекин у тортолмаяпти.