“Барса” катта трансфердан воз кечди!

“Барселона” раҳбарияти бош мураббий Хави Эрнандес жиддий қизиқиш билдираётган марказий ҳимоячи Маттейс де Лигт трансферидан воз кечишга қарор қилди.

Corriere dello Sport нашрининг ёзишича, бунга “Ювентус” трансфер учун жуда катта сумма талаб қилаётгани сабаб бўлган.

Манбанинг таъкидлашича, туринликлар нидерландиялик ҳимоячини қўйиб юбориш учун 100 миллион евро сўраган. Каталонияликлар буни нарх сунъий равишда оширилган, деб баҳолади ва Маттейс вариантидан воз кечди.

Бундан ташқари, де Лигтнинг ўз хизматлари учун катта маош талаб қилиши ҳам каталонияликларнинг ички сиёсатига тўғри келмайди. Клуб ҳозир деярли барча ўйинчиларидан маошни пасайтиришга кўнишни талаб қиляпти.

22 ёшли Маттейс де Лигт ўтган мавсумда 42 марта майдона тушиб, ўз вазифасини уддалашдан ташқари рақиблар дарвозасини уч бор ишғол қилди ва битта ассист муаллифи бўлди.