Баллардини "Лацио"га қарши беллашувдан кейинги матбуот анжуманида "Ювентус" қизиқишлари доирасидаги икки шогирди ҳақида тўхталди

Италия А Сериясининг 34-турида Элдор Шомуродов тўп тепаётган "Женоа" клуби "Лацио" майдонига сафар уюштириб, 3:4 ҳисобида мағлуб бўлди. Ушбу баҳс ҳақида генуяликлар бош мураббийи Давиде Баллардини қуйидагича фикр билдириб ўтди:

"Биринчи таймда ўйинга жиддийроқ эътибор қаратишимиз ва уюшқоқ бўлишимиз лозим эди. "Лацио" ўзини яхши ҳис қилаётганди ва биз ташаббусни бериб қўяётганимизни сезиб тургандик. Аммо бугун ҳар бир ўйиннинг энг сўнгги дақиқаларигача рақибларимизга муносиб қаршилик кўрсата олишимизни исботладик. 

Бу каби жамоаларга қарши ўйнаш анча мушкул. Ҳимоя чизиғимизда яхши футболчилар жам бўлган ва уларни айбламоқчи эмасман. 

Скамакка ҳужумчи учун муҳим бўлган сифатларга эга ажойиб футболчи. Бироқ, у ҳали ёш ва ҳали кўп нарсаларни исботлаши мумкин. Бу каби футболчига ҳар куни мураббийлик қилиш ёқимли. 

Ровелла ҳам захирадан майдонга тушиб, яхши ўйин намойиш этди. Унинг ҳаракатлари мени ҳайратда қолдирмади, унда потенциал бор. Аммо позиция танлашдаги ҳаракатларини такомиллаштириши керак. У ва Скамакка ажойиб футболчилар", - деди Баллардини.