Арбелоа Мбаппени мақтади: "Биз кутган Килиан айнан шу"

"Реал" бош мураббийи Альваро Арбелоа Чемпионлар лигаси чорак финалида "Бавария"га қарши уйдаги мағлубиятдан (1:2) кейин Килиан Мбаппенинг ўйинига юқори баҳо берди.

Франциялик ҳужумчи 74-дақиқада мадридликларнинг баҳсдаги ягона голига муаллифлик қилди.

Арбелоа Мбаппенинг ҳаракатларидан мамнун эканини яширмади.

"У ўйинга жуда катта эътибор билан ёндашди, доим рақиб дарвозасига хавф солиб турди. Биз кўришни истайдиган Мбаппе айнан шу. Унинг ўзи ҳам ҳар куни шундай бўлишни хоҳлайди", — деди мураббий.

Шунингдек, у қанот ҳимоячиси Альваро Каррераснинг Майкл Олисега қарши қийналгани ҳақида ҳам фикр билдирди.

"У дунёнинг энг яхши футболчиларидан бирига қарши ўйнади, бу эса осон эмас. Менинг Альварога бўлган ишончим сира ҳам камаймайди, у бугунги ўйиндан тўғри хулоса чиқаради.

Қанот ҳимоясида ўйнаганлар бу позиция қанчалик қийинлигини яхши билади. Аммо Альваро — “Реал”нинг бугуни ва келажаги бўлган футболчи", — дея таъкидлади Арбелоа.