Абрахам, хотиржам кетавер, ўрнингга Шомуродов бор!
- 25-апрел 2022, 21:55
- Zohir Toshxo’jayev
- 3
- Футбол
“Рома” раҳбарияти Англиянинг гранд клубларидан таклиф олаётган Тэмми Абрахамни ушлаб қолишга қийналадиган кўринади.
Аввалроқ, кучли бешлик чемпионатларидаги англиялик футболчилар орасида энг кўп гол ураётган бу форвардга “Манчестер Юнайтед”, “Тоттенхэм”, “Арсенал” ва уни тарбиялаган “Челси”нинг ўзи қизиқаётгани ҳақида хабарлар тақатилган эди.
“Канонирлар” мавсум якуналанаётганини инобатга олиб, конкрет таклифга ўтди. Микель Артета кўп гол ура оладиган ўткир ҳужумчига эҳтиёж сезмоқда. “Арсенал”ни Обамеянг тарк этди, Александр Ляказетт ҳам ўзига бошқа жамоа қидиряпти. Дарҳақиқат, франциялик ҳужумчига даъвогарлар орасида Рим клуби ҳам бор.
Daily Star нашрининг хабар беришича, “Арсенал” Тэмми Абрахамни олиш учун римликларга 59 миллион евродан кўпроқ бадал тўлашга тайёрлигини билдирмоқда. Бу таклиф “Рома” вакилларини қизиқтириши мумкин. Чунки улар 40 миллион еврога олинган футболчидан бир мавсумда 20 миллион евро атрофида фойда кўряпти. Қолаверса, бу савдонинг боши. Ҳали томонлар олди-бердига қараб, суммани ўзгартириши мумкин.
Тэмми Абрахам бу мавсумда 46 та учрашувда ўз ҳисобига 24 та гол ёздириб қўйди. Шунга қарамай, мутахассислар ва мухлислар англиялик ҳужумчини кўплаб қулай вазиятларни барбод қилаётганликда айблаб келади.
“Рома”да Абрахамнинг асосий ўринбосари Элдор Шомуродов ҳисобланади. Куни кеча “Интер”га қарши ўтказилган беллашувда ҳам легионеримиз англиялик ҳамкасбининг ўрнига майдонга тушиб, миланликлар ҳимоя чизиғини ёриб ўтди ва Генрих Мхитарянга голли пас узатди.
Кўпчилик Жозе Моуриньо Элдор Шомуродовга етарли имкон бермаяпти, деган фикр билдираётганини ҳам таъкидлаш лозим. Шундай экан, Абрахам кетган тақдирда Шомуродовга йўл очилади.
Моуриньога “Реал” футболчиси керак
Италиянинг етакчи нашрлари “Рома” мураббийи Жозе Моуриньо “Реал” футболчиси Дани Себальосга жиддий қизиқаётгани ҳақида хабар тарқатмоқда.
25 ёшли футболчи “Бетис” тарбияланувчиси ҳисобланади ва 2017 йилдан бери “Реал”нинг асосий таркибидан муқим жой олиш учун курашиб келади. Себальос ўтган мавсумни ижара асосида “Арсенал”да ўтказди.
Жорий мавсум бошида яна Мадридга қайтган ярим ҳимоячи италиялик бош мураббий Карло Анчелоттининг ишончига кира олгани йўқ. Дани бор йўғи 12 марта майдонга тушиб, Испания кубогида атиги битта ассист қайд этди холос.
Футболчининг амалдаги шартномаси келаси мавсум охирида якунланади. “Қироллик клуби” асосий таркибдан четда қолаётган ўйинчига янги битим таклиф қилмайди ва ёзда уни сотиб юборади.
Рим клуби бу вазиятдан фойдаланиб, майдон марказини кучайтириш мақсадида Дани Себальосни А Серияга кўчириб келмоқчи. Бу футболчи марказий ярим ҳимоячи вазифасидан ташқари, чап қанотда ҳам самарали ўйнай олади.
Бир вақтлар трансфер суммаси 50 миллион евро атрофида баҳоланган Себальосни ёзда 15 миллион еврогача бўлган нархда трансфер қилиш мумкин.
“Рома”нинг келажаги Моуриньо қўлида!
Рим клуби спорт директори Тьягу Пинто жамоа бош мураббийи Жозе Моуриньо яхши ишлаётгани ва клуб раҳбарияти унинг натижаларидан қониқаётганини билдирди.
- Моуриньо бутун мавсум давомида жуда яхши ишлаяпти. Биз Еврокубоклардаги иштирокини даом эттираётган Италиянинг ягона жамоасимиз. Стратегиямиз илк кунларданоқ аниқ эди ва келажакда ҳам ўзгаришсиз қолади.
Биз лойиҳамиз муваффақиятли давом этиши учун Жозе Моуриньо нафақат майдонда, балки ундан ташқарида ҳам бу ишга катта ҳисса қўшишини билар эдик, - деди Тьягу Пинто.
Жозе Моуриньо ўтган йилнинг ёзида “Рома”ни қабул қилиб олганидан кейин дастлабки мавсумни жанговар таркиб тузишга сарфлади. Португалиялик мутахасисс мавсум давомида таркибнинг заиф нуқталарини аниқлаб олди ва ёзда уларни кучайтирадиган трансферларни амалга оширишни режалаштирмоқда.
