"Sports Illustrated" yil bokschisini e’lon qildi

Superog‘ir vazn toifasida asosiy kamarlardan uchtasini o‘zida saqlab turgan Aleksandr Usik WBC tomonidan yil bokschisi deb topilgandi. 

Dunyoga mashhur "Sports Illustrated" nashri ham ukrainalik jahon chempionini 2024 yilning eng yaxshi bokschisi deb e’lon qildi. Mag‘lubiyat va murosa nimaligini bilmay kelayotgan Usik 2024 yilda 2 ta jang o‘tkazib, har ikkisida sobiq WBC chempioni Tayson Fyurini ochkolar hisobiga ko‘ra engdi. 

Bokschilar o‘rtasidagi dastlabki jang 18 may kuni bo‘lib o‘tgan va o‘shanda Fyuri WBC chempioni edi. O‘n ikki raund to‘liq davom etgan bahsda Aleksandr hakamlarning ayri qarori bilan zafar quchgandi. O‘sha g‘alaba evaziga Usik superog‘ir vaznda mutlaq jahon chempioniga aylangandi. 21 dekabr kuni Ar-Riyod shahrida bo‘lib o‘tgan revansh jangida ukrainalik hakamlarning yakdil qarori bilan g‘alaba qozondi.

Bu haqda O‘zbekiston professional boks federatsiyasi xabar bermoqda.