Shomurodov Shevchenkoni ranjitishi kerak!

FIFA kunlari ham o‘z nihoyasiga etdi. Endi yana barchamizning e’tiborimiz milliy chempionat bahslariga qaratiladi.

O‘zbekistonlik millionlab futbol ishqibozlari uchun Evropaning kuchli beshlik chempionatlari orasida Italiya A Seriyasi alohida qiziqish bilan kuzatib boriladi. Chunki “Roma” safida hamyurtimiz Eldor Shomurodov harakat qiladi. O‘tgan tur safarda “Venetsiya”dan (3:2) uchralgan alamli mag‘lubiyatdan so‘ng Joze Mourino shogirdlari musobaqa jadvalidagi o‘rnini yaxshilab olishlari lozim. Buning uchun esa 21 noyabr kuni Rimda “Jenoa” taslim etilishi kerak.

Eldor uchun muhim bo‘lgan ushbu uchrashuv Toshkent vaqti bilan soat 00:45 da boshlanadi.

Yana bir e’tiborli jihat shundaki, Shomurodov “Roma”ga o‘tishdan oldin aynan “Jenoa” safida to‘p surgan. Qolaversa, yaqinda genuyaliklar boshqaruvini qo‘lga olgan Andrey Shevchenko ham debyut uchrashuvida g‘alaba qozonishni maqsad qilgan.

Bir so‘z bilan aytganda, Italiya poytaxtida bizni qiziqarli uchrashuv kutmoqda.  Olg‘a, Eldor! Olg‘a, “Roma”!

Ma’lumot uchun, "Roma" 12 turdan so‘ng 19 ochko bilan A Seriya musobaqa jadvalida 6-o‘rinda bormoqda.  Hisobida 9 ochko bo‘lgan "Jenoa" esa 17-pog‘onadan joy olgan.