Qozog‘iston madaniyat va sport ishlari vazirligi: "Yurtimizda jahon chempionatini o‘tkazish masalasi ko‘rib chiqilmayapti!"

Xabaringiz bor, O‘zbekiston futbol assotsiatsiyasi va Qozog‘iston futbol federatsiyasi birgalikda 2034 yilgi jahon chempionatiga ariza topshirmoqchi ekani haqida xabarlar tarqaldi. Bunga javoban Qozog‘iston madaniyat va sport ishlari vazirligi o‘z munosabatini bildirdi. 

"Madaniyat va sport ishlari vazirligi Qozog‘iston futbolini rivojlantirishga alohida e’tibor qaratib, bu yo‘nalishda har tomonlama ishlar olib bormoqda. Ammo shuni ta’kidlaymizki, Qozog‘istonda jahon chempionatini o‘tkazish masalasi ko‘rib chiqilmayapti, shu sababli mamlakatimiz chempionlik uchun ariza topshirishni rejalashtirmayotganini ma’lum qilamiz”, - deyiladi "Zakon.kz" nashrida chiqqan xabarda.

Avvalroq, mutaxassis Alisher Nikimbaev ham bu masalaga o‘z telegram kanalida qisqacha to‘xtalib o‘tgan edi.  

"Qozog‘iston va O‘zbekistonning 2034 yilgi jahon chempionatini o‘tkazish uchun qo‘shma ariza bergani haqidagi xabarga kelsak, bundan o‘ttiz yil avval Toshkent 2000 yilgi Olimpiada o‘yinlariga mezbonlik qilish uchun ariza topshirganini eslatib o‘tmoqchiman", - deyiladi postda.