"Хоразм" сюрприз бўладими ёхуд Ҳаким Фузайлов иккита ғалаба, тақвим ва таркиб ҳақида

15 йилдан сўнг Суперлигага қайтган “Хоразм” клуби стартни омадли бошлади. Биринчи турда “Шўртан”ни 2:0 ҳисобида мағлуб этган урганчликлар иккинчи турда Термизда “Сурхон”ни ҳам 2:0 натижаси билан енгишга муваффақ бўлди.

Кўпчилик Ҳаким Фузайлов бошқарувидаги жамоадан бундай стартни кутмагани рост. Икки турдан кейин “Хоразм” мусобақа жадвалида пешқадам бўлиб турибди.

Sports.uz журналисти “Хоразм” устозига бир қатор саволлар билан мурожаат қилди.

- Ҳаким Қаюмович, "Хоразм" клуби Суперлигани кетма-кет иккита - 2:0 ҳисобидаги ғалабалар билан бошлади. Айтинг-чи, бундай стартни кутганмидингиз?

- Йўқ, албатта кутмагандим. Шунинг учун бизнинг футболчилар учун жуда хурсандман. Ортда қолган ўйинларда ўз иродаси, характери ва профессионализмни кўрсатишганидан ниҳоятда мамнунман. Мен бутун жамоамиз учун уларнинг ўз ишига бўлган садоқат ва ҳалол муносабатидан хурсанд бўляпман.  

- Термиздаги очилиш ўйинида "Сурхон"ни мағлуб этдингиз. Ваҳоланки, кўпчилик "Сурхон"нинг ғалабасини кутганди. Ўйин ҳақида фикрингиз қандай?

- “Сурхон”нинг ўйинини мукаммал ўргангандик. Уларнинг кучли ва кучсиз тарафларини билардик. Кўп нарса амалга ошди. Аммо хатолар ҳам кўп бўлди. Асосийси, ютдик ва хатоларимиз устида ишлашни давом эттирамиз.

- Про лигадан Суперлигага қайтган "Хоразм" сюрприз жамоа бўладими?

- Ҳозир бу тўғрисида гапириш қийин. Бор-йўғи иккита тур ўйнадик. Бу ҳақида биринчи давра якунига яқин ўйлаймиз.

- ФИФА кунлари бошланди. Жамоанинг тайёргарлик режаси қандай?

- 2-3 кун дам олиш ва шундан сўнг кейинги турга тайёргарлик кўрамиз.

- "Хоразм" 3-турда "Бухоро", кейин "Қизилқум" билан ўйнайди. Нима деб ўйлайсиз, календарь "Хоразм" учун омадли келди, шундайми?

- Тақвим бизга омадли келдими ёки омадсизми, айтиш қийин. Барибир ҳар бир жамоа билан ўйнашга тўғри келади.

- Таркибга кўплаб янги футболчилар таклиф қилинди. Жамоа сиз хоҳлагандек йиғилдими?

- Жамоамиз таркибини жиддий ўзгартирдик. Тажрибали, соврин ютган ўйинчилар билан бирга ёш иқтидорли футболчилар бор. Мураббийларга ҳар доим бирор нарса етмаётгандек туюлади. Асосийси, тажриба, иқтидор ва профессонализм. Ундан ҳам муҳими тартиб-интизомга қатъий амал қилишидир.