Винисиус “Реал”дан кетадиган бўлди

Испания чемпионатининг ўнинчи турида “Реал” футболчилари ўз мухлислари кўз ўнгида амалдаги чемпион “Барселона”ни 2:1 ҳисобида мағлуб эти, мусобақа жадвалидаги пешқадамлик мавқеини мустаҳкамлаб олди.

Бу галги “эл-класико” ҳам жуда оғир ўтди. Ўйин томонларнинг жанжали билан тугайди. Яна Винисиус Жуниор ўзининг характерини кўрсатган “қаҳрамон”лардан бўлди.

Аввалига бразилиялик футболчи 72-дақиқада захирага олинган паллада бош мураббий Хаби Алонсога ҳурматсизлик қилди ва тўғри ичкарига кириб кетди. Кейин эса, ўйин охиридаги можарода Ламин Ямал билан жанжаллашди.

Marca ва DAZN каби манбаларнинг аниқлашича, Винисиус Жуниор захирага олинган пайтда “Реал”дан кетмоқчилигини маълум қилди. У “Мен жамоадан кетаман, кетганим яхши...”, деб норозилик билдирган.

Яна бир манба –  AS нашрининг маълум қилишича, бразилиялик легионер бош мураббий хаби Алонсо уни ёқтирмаслигини ҳис қиляпти. Винисиус мураббийнинг ҳимояга  ёрдам бериш талабини бажараётган бўлса-да, Хаби Алонсо буни инобатга олаётгани йўқ. Винисиус унинг асосий ўйинчи мавқеини ҳурмат қилишмаётганини таъкидлаяпти.

Агар жамоа ичидаги вазият ўзгармаса, 25 ёшли футболчи кетишини очиқ айтди. Бу ўзгариш январь ойидаёқ юз бериши мумкин.

Винисиус Жуниор Мадрид суперклубида 2018 йилдан бери ўйнаяпти. Унинг амалдаги шартномаси 2027 йилнинг 30 июнигача давом этиши белгиланган.