Трент Александр-Арнольд нима учун формасида фамилияси эмас, исми ёзилганини тушунтирди

"Реал" клубининг янги футболчиси Трент Александр-Арнольд нима учун формасига фамилияси эмас, исмини ёздирганини тушунтирди.

"Ҳаммаси жуда оддий. Европада саёҳат қилган йилларим давомида одамлар учун исмимни айтиш қийин бўлганини сездим. Исмим уч сўздан иборат — Трент Александр-Арнольд — ва ҳар ким мени бошқача чақиради: кимдир "Александр", кимдир "Арнольд", яна бошқалар шунчаки "Трент" деб атайди.

Шунинг учун бу масалани соддалаштиришга қарор қилдим. Менинг исмим — Трент. Энди футболкамда ҳам шундай ёзилади. Ҳамма мени шундай чақиришини хоҳлайман," — дея футболчининг сўзларини келтиради AS нашри.

Эслатиб ўтамиз, Александр-Арнольд "Ливерпуль"дан "Реал"га эркин агент сифатида ўтди. Англиялик футболчининг тақдимоти 12 июнь куни бўлиб ўтди.