Shota Arveladze OChLda "Paxtakor" jamoasi oldiga qanday vazifa qo‘yilganini aytdi

Xabaringiz bor, ertaga OChL-2020 1-turidan o‘rin olgan "Paxtakor" - "Shabab Al Ahli" uchrashuvi o‘tkaziladi.

Bugun o‘yindan oldingi matbuot anjumani o‘tkazildi. Unda "sherlar" ustozi Shota Arveladze quyidagi fikrlarni bildirib o‘tdi.

- Birinchi navbatda yangi mavsum boshlangani bilan barchani tabriklayman. Biz yangi mavsumni boshlamoqdamiz. G‘alaba bilan boshlash juda muhim biz uchun, xalq uchun. Dastlabki 2 ta o‘yinning ahamiyati yuqori. Nafaqat 2 ta o‘yinni balki butun musobaqadagi uchrashuvlar juda muhim.

Guruhimiz kuchli jamoalardan tashkil topgan. Muxlislarni stadionga chorlab qolaman.

Jamoa oldiga guruhdan chiqish vazifasi qo‘yilgan.

Ertangi raqibimiz juda jiddiy. Hujum chizig‘ida tajribali futbolchilar bor. Hujumkor o‘yinni hush ko‘radi. Yarim himoyada ham kuchli o‘yinchilar jamlangan. Ular futbol o‘ynashni yaxshi ko‘rishadi. Qolaversa, tarkibda Ispaniya va Argentinadan futbolchilar bor. Chempionatida yaqqol peshqadam. Barcha o‘yinchi ertangi bellashuvda ishtirok etishga tayyor.

Sadriddin Abdullaev va Akramjon Komilov jarohatidan to‘liq forig‘ bo‘lmagani uchun hozircha bizga yordam bera olmaydi.

Osiyolik futbolchi? Hozir OChL qaydnomasi yakunlangan. Osiyolik futbolchi bilan safimizni to‘ldirishni birinchi davradan keyin o‘ylab ko‘ramiz, - dedi Arveladze.