Шомуродов ўзбек футболчилари учун Европага йўл очмоқда!
Ўзбекистон миллий терма жамоаси сардори ва энг зўр тўпурари Элдор Шомуродов “топ-5” лигалар қаторига кирувчи А Серияни тарк этиб, фаолиятини қатор юлдузларни жамлаётган Туркия Суперлигасида давом эттирадиган бўлди.
Жаҳон футболи экспертлари 30 ёшли ҳужумчининг қарорини таҳлил қилиб, қизиқарли гепотезаларни илгари сурмоқда. Sports.uz портали ана шундай таҳлилий маълумотлардан бирини ўзбек футболи мухлислари эътиборига ҳавола этади.
City Football Group холдинги ниҳоят Туркияга ҳам етиб борди. Қудратли халқаро ташкилот 2024 йилдан бери “Истанбул Башакшеҳир” билан ҳамкорлик қилиб келади. Ҳозирча, бу холдинг турк клубига эгалик қилмайди, балки фаол ҳамкорликни йўлга қўйган холос.
Абдуқодир Ҳусановнинг City Football Group эгалик қилувчи “Манчестер Сити”га ўтгани ва Англиядаги фаолиятини ёрқин бошлагани бу холдинг раҳбарларини Марказий Осиё бозорига қизиқтириб қўйди. Айни пайтда бу йирик ташкилот Ўзбекистон чемпионатидан ҳам бир клубни ўз сафига қўшиб олиши ҳақида маълумотлар айланмоқда. Ҳозирча бу ўзининг амалий тасдиғини топгани йўқ. Эътиборлиси, City Football Group ҳамкорли бўлган “Башакшеҳир” ўзбек футболчиларини ола бошлади.
Элдор Шомуродов Италиядаги беш йиллик фаолиятидаг кейин Туркияга келди. Бу ҳужумчи узоқ вақт ўзига бериладиган ҳар қандай имкон учун талашиб яшади. “Рома”дан “Специя” ва “Кальяри”га ижарага бориб келди. Рим клубида қаттиқ меҳнат қилди, ҳатто захирадан майдонга тушиб ҳам жамоага фойда келтира олишини намойиш қилди.
Римликларнинг янги бош мураббийи Жан Пьеро Гасперинига Шомуродовнинг улкан меҳнаткашлик қобилияти маъқул келиши кутилганди. Чунки Элдор – ҳақиқий прессинг машинаси. Аммо вазият бошқача якунланди ва Шомуродов “Башакшеҳир”га ижарага жўнатилди. Келишувга кўра, айрим талаблар бажарилса, тўлиқ трансфер қилиш мажбурияти ишга тушади.
“Башакшеҳир”да 48 та гол урган Кшиштоф Пёнтек кетганидан кейин марказий ҳужумчига эҳтиёж туғилганди. Қизиғи, бир неча йил олдин, Элдор Шомуродов “Женоа”га айнан Пёнтекнинг ўрнини босиш учун олиб келинган эди. Тарих такрорланмоқда.
Шомуродов ортидан Ўзбекистон миллий терма жамоасининг яна бир ёрқин юлдузи – Аббосбек Файзуллаев ҳам Истанбулга келиши кутиляпти. Унинг ЦСКА билан бир йиллик битими қолди холос. Агар “армиячилар” уни 2026 йилнинг ёзида бепул қўлдан чиқаришни истамаса, шу ёз сотиб юбориши керак.
Файзуллаев медиада таниқли шахс ва ёш ўйинчи сифатида зўр резюмега эга. 21 ёшли ҳужумкор футболчи клублар миқёсида 100 дан зиёд учрашув ўтказган, Олимпия ўйинлари ва Осиё кубоги каби йирик турнирларда тажриба тўплади. Олдинда – Ўзбекистон учун биринчи жаҳон чемпионати кутиб турибди.
Шомуродовнинг 30 га кирганини инобатга олсак, ундан катта прогрессни кутиш ноўрин. Аммо Файзуллаев бу борада ўта катта салоҳиятга эга. City Football Group ўйинчиларни ривожлантиришга уста ташкилот. Агар Аббос “Башакшеҳир”га келиб ўйини қовушиб кетса, City Football Group таркибидаги “Жирона”га йўл очилиши мумкин. Файзуллаевнинг ишлари Испанияда ҳам юришиб кетган тақдирда эса, дўсти Абдуқодир Ҳусанов ёнига – “Манчестер Сити”га бориши эҳтимолдан холи эмас.
Умуман олганда эса, City Football Group билан дўстлашган клубнинг ўзига бориш ҳам катта муваффақият ҳисобланади. Чунки бу ташкилот футболчи танлашни ва улар билан ишлашни билади. Аббосбек Файзуллаев “Башакшеҳир”да ўйнаб, City Football Group холдингининг “Манчестер Сити” ёки “Жирона” каби катта клубларигача етиб боролмаган тақдирда ҳам, Европадан ўзига мос яхши жамоа топиши аниқ...
Фикрлар