Сендан “Реал” ўйнатмаган ўйинчи яхши! Манчестерликлар “Реал” билан футболчи алмашади

“Манчестер Юнайтед” раҳбарияти қишки трансферлар даврида бир ҳаракат билан икки жамоанинг бош оғриғини ҳал қилишга уриниб кўради.

Гап шундаки, Рубен Аморим клуб тарбияланувчиси Кобби Майнуга етарли даражада ўйин амалиёти бермаяпи. “Реал”да эса, бразилиялик ҳужумчи Эндрикни Хаби Алонсо бирор маротаба майдонга туширгани йўқ. Ҳар икки ёш футболчи жамоадаги ҳолатдан норози.

Defensa Central журналистларининг ёзишича, манчестерликлар январда “Қироллик клуби”га ўзаро ўйинчи алмашишни таклиф қилмоқчи. Улар икки томонлама ижара шартномаси асосида Майнуни Мадридга жўнатиб, ўзлари “Реал”дан кетишга тайёргарлик кўраётган Эндрикни Манчестерга олиб келишни мўлжаллаган.

Трансферлар бўйича экспертларнинг таъкидлашича, бу рокировкани амалга ошириш деярли имконсиз. Биринчидан, “Қироллик клуби” Эндрикни Франция чемпионатида иштирок этаётган “Лион”га ижарага берадиган бўляпти. Лионликлар ҳам бразилиялик ўйинчига эшик очишга тайёр.

Иккинчидан “Манчестер Юнайтед” таклиф қилаётган Кобби Майну “Реал” даражасидаги ўйинчи эмас ва мадридликларнинг эътиборини тортгани йўқ.