Саудияликлар А Серия тўпурарлардан бирини илиб кетмоқчи

Италиялик ҳужумчи Мойзе Кин фаолиятини Саудия Арабистонида давом эттириши мумкин. "Corriere dello Sport" маълумотига кўра, Саудиянинг "Аль-Кадисия" клуби 25 ёшли форвардга жиддий қизиқиш билдирмоқда ва 52 миллион евро миқдоридаги тўловни амалга оширишга тайёр. Клуб аллақачон футболчининг вакиллари билан боғланган.

Шунингдек, Кинга "Манчестер Юнайтед" ва "Фенербахче" клублари ҳам қизиқиш билдирмоқда. Қизиқарлиси, Киннинг контрактда белгиланган чиқиб кетиш компенсацияси 1 июлдан 15 июлгача амал қилади.

Бироқ, футболчининг ўзи "Фиорентина"да қолиш тарафдори, чунки у ЖЧ-2026да қатнашиш умидида. Клуб ҳам унинг келажагига ишонади ва яқин вақтда янги шартнома имзоланиши кутилмоқда. Амалдаги шартнома 2029 йилгача мўлжалланган.

Ушбу мавсум Мойзе Кин А Серияда 32 ўйинда 19 та гол уриб, мусобақанинг иккинчи тўпурарига айланди.