Роналду пенальтилар қиролига айланди

Португалия терма жамоаси ва “Ан-Наср” ҳужумчиси Криштиану Саудия Арабистони чемпионатининг еттинчи турида “Ал-Фейҳа”га қарши ўтказилган учрашув қаҳрамонига айланди.

Риёд шаҳридаги баҳсда 40 ёшли ҳужумчининг дубли жамоасини мағлубиятдан қутқариб, навбатдаги уч очкони тақдим этди.

Мезбонлар ҳисобни очган учрашувнинг биринчи бўлимида Роналду гол уриб вазиятни тенглаштирди. Учрашув ҳаками ўйиндаги тўхталишлар ўрнини қоплаш учун қўшиб берган вақтнинг 15-дақиқасида пенальтини аниқ бажарган Криштиану жамоасига ғалаба келтирди.

Шу тариқа, Роналдунинг 11 метрлик белгидан киритган голлари сони 179 тага етди. Умумий ҳисобда португалиялик футболчи 214 марта пенальтини ижро этган. Унинг 35 та зарбаси дарвоза тўрига тушмаган.  

Дублдан кейин Роналду фаолияти давомида расмий учрашувларда киритган тўплари сонини 952 тага етказиб, ўзининг рекордини яна янгилади.

Жаҳон футболини кузатиб бораётганларнинг барчаси португалиялик ҳужумчи қачон мингинчи голини уришини кутмоқда.

Криштиану Роналду “Ан-Наср”да 2023 йилдан бери ўйнамоқда. Ҳозирга қадар бу жамоа сафида жами 115 та ўйин ўтказган португалиялик футболчи 102 та гол ва 21 та ассист муаллифи бўлди. Унинг клуб билан шартномаси 2027 йилнинг ярмигача давом этади.