“Реал” бош скаути Англиядан ўзини ҳайратга солган юлдузни олиб келади

Мадриднинг “Реал” клуби Лондоннинг “Арсенал” жамоаси ярим ҳимоячиси Деклан Райсни трансфер қилиш имкониятларини ўрганиб чиқишга киришди.

“Қироллик клуби”нинг бош скаути Жуни Калафат англиялик футболчининг яқинда Чемпионлар Лигаси доирасида “Бавария”га қарши ўтказган ўйинидан (3:1 ҳисобида “канонирлар” ғалаба қозонди) ҳайратга тушган.

Мусобақанинг марказий учрашуви сифатида эътироф этилган ўша баҳсда айнан 26 ёшли хавбек энг яхши ўйинчи совринига лойиқ топилди.

E-Noticies нашри маълумотларига кўра, “Реал” яқин келажакда Англия терма жамоаси юлдузини сотиб олиш имкониятини кўриб чиқади. Transfermarkt портали Деклан Райснинг нархини 120 миллион еврога баҳоламоқда.

Футболчининг “Арсенал” билан шартномаси 2028 йилнинг ярмигача мўлжалланган бўлиб, томонлар ўзаро келишган ҳолда ҳамкорликни яна бир мавсумга узайтириш ҳуқуқига эга.