Ўзбекистонга иккита гол урган футболчи мамлакатдан чиқиб кетолмаяпти

Эрон миллий терма жамоаси ва Италиянинг “Интер” клуби ҳужумчиси Меҳди Тареми АҚШ мезбонлик қилаётган клублар ўртасидаги жаҳон чемпионатида иштирок этиш учун сафарга чиқа олмаяпти.

La Gazzetta dello Sport нашрининг ёзишича, 32 ёшли футболчи Теҳрондан Калифорнияга бориши керак эди . Лекин Эрон ва Исроил ўртасида бошланган қуролли можаро туфайли бу мамлакатларнинг ҳаво йўллари ёпилган ва парвозлар номаълум муддатга тўхтатилган.

Манбага кўра, Тареми мамлакатни тарк этиш учун Теҳро халқаро аэропортига келган, бироқ хавфсизлик нуқтаи назаридан бу ердан кетишга мажбур бўлган.

Айни пайтда “Интер” вакиллари футболчи билан алоқада бўлиб турибди ва вазиятдан чиқиш йўллари қидириляпти.

Эслатиб ўтамиз, 2026 йилги жаҳон чемпионатининг минтақавий саралаш турнири доирасида Ўзбекистон терма жамоаси дарвозасига иккита гол урган Меҳди Тареми Эрон футболчиларини мундиалга олиб чиққан эди. Ўша учрашув 2:2 ҳисобида дуранг билан якунланган ва форслар Осиё мамлакатлари орасида биринчилардан бўлиб жаҳон чемпионати йўлланмасини қўлга киритган.