"Ўзбек футболида 35 ёшдан кейин футболчиларни четга чиқариб қўйишади" ёхуд қариликни тан олмасдан гол ураётган ҳужумчи ҳақида

Чемпионатимизда яхши савиядаги ҳужумчилар олдин кўп бўлган. Уларни аксариятини мухлислар ҳозиргача эслаб юрадилар. Бизнинг бугунги мақоламиз қаҳрамони ишқибозлар меҳрини қозонган Мўйдин Мамазулумов.

Балки кўпчилик уни унутиб юборган бўлиши ҳам мумкин. Аммо у 38 ёшда бўлишига қарамасдан ҳали ҳамон катта футболда ўйнаб юрибди. Ҳозирда биринчи лига мусобақасида “Дўстлик Олтиариқ” жамоаси шарафини ҳимоя қилиб келмоқда. Эътиборлиси, Мамазулумов ҳамон гол уришни унутгани йўқ.

Sports.uz мухбири билан мулоқот жараёнида Мўйдин дилидаги гапларни айтди.

“Ёшларга ўрнак бўлишга ҳаракат қиляпман”

- Аввало, яхши кунларда эслаганингиз учун раҳмат. Ҳа, Суперлигада кўринмай қолдим. Охирги марта 2017 йили “Нефтчи”да ўйнадим. Ўша пайтда бу клуб про лигага тушиб кетиб, ўрнига “Цементчи” чиққанди. Абдумалик Ҳакимов бош мураббий бўлди. Кейин ҳужумчилардан мен билан Шерзод Ҳакимовга жавоб бериб юборди. Ҳолбуки, иккинчи даврада “Нефтчи”да 9 та гол уриб бўлгандим. Тайёр ҳужумчилари бўлишига қарамай, ўша пайтда мураббий бошқа ҳужумчиларим бор, деди ва биз кетдик. Олган ҳужумчилари эса кўп гол уролмади. Шундан кейин про лигага кетдим. “Истиқлол”да ўйнадим. “Турон”да ҳам фаолият олиб бордим. Бу клубни биринчи лигага, сўнгра про лигага олиб чиқдик. “Турон” таркибида 27 та гол урдим. Кейинчалик у ердан ҳам кетдим. Мана, ҳозирда “Дўстлик Олтиариқ” жамоасидаман. Иккинчи лигадан биринчи лигага олиб чиқдик. Ўзбекистон Кубогида “Машъал” ва “Қўқон-1912” клубларига қарши учрашувларда рақиб дарвозаларига гол урдим. Ёшларга ўрнак бўлиш учун ҳаракат қиляпман.

“Суперлига ва про лигада ҳам 70-80 фоизга ўйнайвераман”

- Ўзбек футболида 35 ёшдан кейин футболчи ўйнамайди, югурмайди, деб фикрлайдиганлар кўп ва четга чиқариб қўядилар. Мана, Суперлигани ҳам, про лигани ҳам ҳужумчиларини кўряпмиз. Ёшларга эътибор қаратяпмиз, дейишяпти. Фақат гол урадиган ёшлар бўлса бошқа гап. Мураббийлар 35 ёшдан кейин футболчиларни четга чиқариб қўйишяпти. Ҳайронман, ёшнинг нима аҳамияти бор? Ўйнайдиган футболчи барибир ўйнайверади. Тўғри, олдингидек 100 фоиз куч билан ўйнай олмаслигим мумкин. Кўпчилик қарилигини тан олмаяпти, деб ўйлашлари ҳам табиий ҳол. Лекин ҳозир ҳам Суперлигада ва про лигада 70-80 дақиқа ўйнайвераман.  

“Камида 10 та гол урмасак, кўнглимиз тўлмасди”

- Биз ўйнаган пайтларни эсга оладиган бўлсам, масалан, Олмалиқда 4 нафар ҳужумчи бўларди. Мен, Артурас Фоменко, Бахтиёр Ҳамидуллаев ва Александр Востриков. Тўртта ҳужумчи ўртасида рақобат бор эди. Албатта, бунда ўсиш бўлади. Ҳозир эса ёшлар яхши пул олиб ўрганиб қолган. Шартномасига оладиган пули ёзилади ва шуни йил давомида олиб, ўз устида ишламай қўяди. Биз ўйнаган даврда тинмасдан ишлардик, гол урардик, ҳаракатдан тўхтамасдик. Камида 10 та гол урмасак, кўнглимиз тўлмасди. Ҳозиргилар шартномани тузиб қўйиб, барибир ўша пулимни оламан, деб хотиржам бўлиб қолади.

“Черан ишини қилиб қўйяпти”

- “Пахтакор”да ўйнаётган Драган Черанни кимдир у дейди, кимдир бу дейди, аммо ишини қилиб қўйяпти. 17-18 та гол уряпти, ҳар йили Черан тўпурар бўлиб келяпти. Ўйинини кўраман, ҳавас қиламан. Керакли жойда югуради, керакли жойда очилади. Бирга тўп сурган Темурхўжа Абдухолиқовни ўйинларини ҳам кузатиб тураман. “Насаф”даги Бобур Абдухолиқовни ўйинларини ҳам томоша қилардим, у хорижга кетди. Ҳозир Ҳусайн Норчаев яхши чиқяпти, ҳаракати зўр. Норчаев каби ҳужумчилар йўқ. Кўзга ташланганига икки йилча бўлди.

“Фаолиятимни тугатиш ҳақида ўйлаётганим йўқ”

- “Дўстлик Олтариқ”да тўп сураётганимга бир йил бўлди. Бу йил биринчи лигада иштирок этишни бошладик. Биз бу йил расмий ўйинимизни Кубок доирасида “Машъал”га қарши учрашув билан бошладик. Бу клуб про лигада 2-ўринда кетяпти. Кейинги турда Суперлига вакили “Қўқон-1912” билан ўйнадик. Иккала ўйинда ҳам гол урдим. Айтмоқчиманки, бемалол ўйнаса бўлади. Ҳаммаси ҳаракатга, мураббийга, меҳнатга ва хоҳишга боғлиқ. “Дўстлик Олтиариқ” олдига қўйган мақсадига босқичма-босқич эришиб боради. Вазифа кучли учталикка кириш. Гарчи 38 ёшда бўлсам-да, ҳали фаолиятимни тугатиш ҳақида ўйлаётганим йўқ. Агар “Дўстлик Олтиариқ”да бўлсам, яна тўрт йил ўйнашим мумкин. Про лига ёки бошқа клубда эса икки йил ўйнай олишим мумкин. Ҳозирги футболчилар билан бемалол ўйнаса бўлади.