Ot minishni bizning sportchilardan o‘rganing!

Poytaxtimizdagi “Universal Horses Stable” ot sporti klubida ot sportining ikki asosiy yo‘nalishi — to‘siqlardan sakrash (konkur) va ot yo‘rttirish (dressaj) turlari bo‘yicha O‘zbekiston Respublikasi Prezidenti kubogi, Jahon kubogi 1–2 saralash bosqichlari, Osiyo kubogi, CDI1* (FEI Dressage xalqaro darajadagi musobaqa), “FEI Dressage World Challenge” musobaqalari o‘tkazilmoqda.

Ushbu nufuzli sport tadbirlari orasida ot yo‘rttirish yo‘nalishidagi CDI1* va “FEI Dressage World Challenge” musobaqalarida O‘zbekiston milliy terma jamoasi chavandozlari munosib ishtirok etdi va yakkalik bahslarda umumiy hisobda 4 ta oltin, 6 tadan kumush va bronza, jami 16 ta medal jamg‘ardi. Shuningdek, jamoaviy bellashuvlarda terma jamoamiz 2-o‘rindan joy oldi.

Endi dunyo va o‘zbek chavandozlari to‘siqlardan sakrash (konkur) yo‘nalishida 27 aprel kuniga qadar o‘tadigan Jahon kubogi (2-bosqich), “Maxima Masters Eurasia” va O‘zbekiston Respublikasi Prezidenti kubogi musobaqalarida ishtirok etadi.

Shuni ta’kidlab o‘tishimiz lozimki, barcha xalqaro musobaqalar 28 aprel kuniga qadar davom etadi.